سايلاۋ القاسى ا ق ش- تاعى پرەزيدەنتتىك سايلاۋدىڭ قورىتىندىسىن راستادى
استانا. KAZINFORM — سەيسەنبى كۇنى ا ق ش- تىڭ 50 شتاتىنىڭ استانالارىندا سايلاۋشىلار القاسى 2024-جىلعى پرەزيدەنتتىك سايلاۋدا سايلانعان پرەزيدەنت دونالد ترامپتىڭ ۆيتسە-پرەزيدەنت كامالا حارريستى جەڭگەنىن رەسمي تۇردە بەكىتتى، دەپ حابارلايدى Kazinform ءتىلشىسى CBS News-كە سىلتەمە جاساپ.
ا ق ش كونستيتۋتسياسىنىڭ 12-تۇزەتۋىنە سايكەس، امەريكالىقتار سايلاۋ كۇنى پرەزيدەنت پەن ۆيتسە-پرەزيدەنتتى تاڭداۋدى قولداۋعا ۋادە بەرەتىن سايلاۋشىلار القاسىنىڭ تىزىمىنە تەحنيكالىق تۇردە داۋىس بەرەدى.
وسىلايشا، سايلاۋ كۇنىنە قاراي ءاربىر شتاتتا دەموكراتيالىق جانە رەسپۋبليكالىق پارتيالار ۇسىنعان سايلاۋشىلاردىڭ ەكى ءتىزىمى بولادى. سايلانعان سوڭ، سايلاۋشىلار ا ق ش پرەزيدەنتتىگىنە كانديداتقا داۋىس بەرەدى. رەسمي تۇرعىدان ولار سايلاۋشىلاردىڭ ەركىنە ساي داۋىس بەرۋى كەرەك، ءبىراق مۇنداي تالاپپەن فەدەرالدى زاڭ جوق، تەك كوپشىلىكتىڭ ەركىنە ساي ەمەس داۋىس بەرگەنى ءۇشىن ايىپپۇل (ەڭ كوبى $1000) سالىنادى. سونىمەن قاتار، بارلىق دەرلىك شتاتتاردا سايلاۋشىلار ولاردى تاعايىنداعان پارتيا الدىندا جاۋاپ بەرەدى. وسى ۋاقىتقا دەيىن بىردە-ءبىر سايلاۋشى باسقا كانديداتقا داۋىس بەرگەنى ءۇشىن جاۋاپقا تارتىلعان جوق.
سايلاۋ القاسى داۋىستارىنىڭ سانى 1964-جىلدان بەرى 538 بولىپ قالدى، ءبىراق ولاردىڭ سانى شتات بويىنشا وزگەرۋى مۇمكىن. 2020-جىلعى سايلاۋ مەن 2024-جىلعى سايلاۋ اراسىندا تەحاس سايلاۋشىلار القاسىنىڭ ەكى داۋىسىن الدى، ال بەس شتات (كولورادو، فلوريدا، مونتانا، سولتۇستىك كارولينا جانە ورەگون) ءارقايسىسى سايكەسىنشە ءبىر سايلاۋ داۋىسىنا يە بولدى. سايكەسىنشە، جەتى شتات ءارقايسىسى ءبىر سايلاۋ داۋىسىنان ايىرىلدى: كاليفورنيا، يللينويس، وگايو، ميچيگان، نيۋ-يورك، پەنسيلۆانيا جانە باتىس ۆيردجينيا.
48 شتات پەن كولۋمبيا وكرۋگىندە (ۆاشينگتون ق.) «جەڭىمپازدىڭ بارلىعىن الۋ» جۇيەسى بار. سوندىقتان شتاتتىڭ جالپى داۋىس بەرۋىنىڭ جەڭىمپازى شتاتتىڭ بارلىق سايلاۋ داۋىستارىن جەڭەدى. وعان كىرمەيتىندەرى — شتات بويىنشا جالپىحالىقتىق داۋىس بەرۋ نەگىزىندە سايلاۋشىلاردى انىقتايتىن مەن مەن نەبراسكا.
ناتيجەسىندە دونالد ترامپ سايلاۋشىلار القاسىنىڭ 312 داۋىسىن، ال كامالا حارريس — 226 داۋىس جينادى. سايلاۋشىلار القاسى 538 ادامنان تۇرادى جانە پرەزيدەنت بولىپ سايلانۋ ءۇشىن 270 داۋىستىڭ كوپشىلىگى قاجەت. ۇلتتىق دەڭگەيدە دونالد ترامپ 77,2 ميلليون، ال كامالا حارريس 75 ميلليون داۋىس جينادى.
2025-جىلدىڭ 6-قاڭتارىندا كونگرەسس سايلاۋشىلار القاسىنىڭ داۋىستارىن ساناۋ جانە سايلاۋ جەڭىمپازىن جاريالاۋ ءۇشىن بىرلەسكەن وتىرىستا جينالادى.
دونالد ترامپ پەن جاڭادان سايلانعان ۆيتسە-پرەزيدەنت دجەي دي ۆەنس 2025-جىلدىڭ 20-قاڭتارىندا تۇستە انت قابىلدايدى.
بۇعان دەيىن Time جۋرنالىنىڭ نۇسقاسى بويىنشا جىل ادامى اتاعى ا ق ش- تىڭ جاڭادان سايلانعان پرەزيدەنتى دونالد ترامپقا بۇيىرعانىن جازعان بولاتىنبىز.
