ساياسي رەفورمالار ناتيجەسىندە ءماسليحاتتاردىڭ قۇزىرەتى كەڭەيدى - پرەزيدەنت

«2022 -جىلى رەفەرەندۋم ارقىلى كونستيتۋتسياعا ماڭىزدى وزگەرىستەر ەنگىزدىك. پارلامەنتتىڭ ءرولىن ايتارلىقتاي كۇشەيتتىك. جالپى، بيلىك تارماقتارىنىڭ جۇمىسىن جەتىلدىرۋ ءۇشىن ناقتى شارالار قابىلدادىق. وندا جەرگىلىكتى وكىلدى بيلىككە قاتىستى ماسەلەلەر دە بار. اتاپ ايتساق، وبلىستىق ءماسليحات سايلاۋى ارالاس جۇيە ارقىلى وتەدى. ال اۋداندىق دەپۋتاتتار تەك قانا ماجوريتارلىق تاسىلمەن سايلانادى. بۇل قادام ەلىمىزدىڭ دەموكراتيالىق جولمەن دامۋىنا زور سەرپىن بەردى دەپ سەنىممەن ايتا الامىز»، - دەدى مەملەكەت باسشىسى ەلوردادا ءماسليحات دەپۋتاتتارىنىڭ Ⅱ رەسپۋبليكالىق فورۋمىندا.

اۋقىمدى رەفورمانىڭ ناتيجەسىندە ساياسي باسەكە جاندانا ءتۇستى. جاڭا ەرەجەگە ساي وتكەن سايلاۋدان كەيىن ءماسليحاتتارعا جاڭا ادامدار كەلدى. التى ساياسي پارتيانىڭ وكىلدەرى دەپۋتات مانداتىنا يە بولدى.

«قازىر ءماسليحات مۇشەلەرىنىڭ وننان ءبىرى عانا - پارتيالىق تىزىممەن كەلگەن دەپۋتاتتار. قالعانى - تۇگەل ءبىر مانداتتى وكرۋگتەن سايلانعان ازاماتتار. ءوزىن- ءوزى ۇسىنعان 434 ادام دەپۋتات اتاندى. اشىعىن ايتساق، بۇرىن ساياسي پارتيالار ءتۇرلى ساناتتاعى ازاماتتارمەن جۇمىسقا كوپ كوڭىل بولمەيتىن. زاڭمەن تالاپ ەتكەننەن كەيىن عانا ءمان بەرە باستادى. مىسالى، پارتيالىق تىزىمدە جاستارعا ارنايى كۆوتا ءبولىندى. بۇل شەشىم ولاردىڭ قوعامدىق-ساياسي ۇدەرىسكە ارالاسۋىنا جول اشىپ بەردى. بۇرىن ءماسليحاتتاعى جاس ازاماتتاردىڭ ۇلەسى 2 پايىزعا دا جەتپەيتىن. قازىر زاڭناماعا ەنگىزىلگەن وزگەرىستەر ناتيجەسىندە بۇل كورسەتكىش ەسەلەپ ارتتى دەۋگە بولادى. بۇگىن دە ورتامىزدا كوپتەگەن جاس دەپۋتاتتار وتىر. ولار ءتۇرلى مىنبەردەن جاستارعا قاتىستى وزەكتى ماسەلەلەردى باتىل كوتەرىپ ءجۇر»، - دەدى قاسىم- جومارت توقايەۆ.

وكىلدى بيلىكتە ايەلدەردىڭ قاتارى دا كوبەيە ءتۇستى. ەلىمىزدە قىز-كەلىنشەكتەردىڭ باستامالارىنا جان-جاقتى قولداۋ كورسەتىلۋدە. ايەلدەردىڭ قۇقىعىن قورعاۋعا باسا نازار اۋدارىلىپ جاتىر. وسىنىڭ ءبارى رەفورمانىڭ ناقتى ناتيجەسى ەكەنى ءسوزسىز.

«سونداي-اق رەفورما پارتيالاردىڭ ايماقتاعى بەلسەندىلىگىن ارتتىردى. ولار وبلىس، اۋدان ورتالىقتارىندا قارقىندى جۇمىس ىستەي باستادى. ازاماتتاردىڭ ساياسي پروتسەسكە كەڭىنەن ارالاسۋىنا مۇمكىندىك تۋدى. جەر-جەردە ءتۇرلى ماسەلە تۋرالى اشىق تالقىلاۋلار ءوتىپ جاتىر. باسقاشا ايتساق، پىكىر الۋاندىعىنا جول اشىلدى. جۇرت جەرگىلىكتى ماسەلەلەردى شەشۋگە بەلسەنە اتسالىساتىن بولدى. بۇل «حالىق ۇنىنە قۇلاق اساتىن مەملەكەت» قاعيداتىمەن تولىق ۇندەسەدى. ساياسي رەفورمالاردىڭ ناتيجەسىندە ءماسليحاتتاردىڭ قۇزىرەتى كەڭەيە ءتۇستى. دەپۋتاتتار وبلىستىڭ جانە رەسپۋبليكالىق ماڭىزى بار قالالاردىڭ اكىمدەرىن بالامالى نەگىزدە تاڭدايتىن بولدى. اتقارۋشى بيلىككە ىقپال ەتە الاتىن باسقا دا قۇزىرەتتەر بەرىلدى. سوندىقتان ءماسليحاتتار ايماقتىڭ الەۋمەتتىك جاعدايىنا اكىمدىكتەرمەن بىردەي جاۋاپتى»، - دەپ تۇيىندەدى پرەزيدەنت.

اۆتور
ايجان سەرىكجان قىزى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى