ساياسي-ەكونوميكالىق رەفورمالارمەن قاتار الەۋمەتتىك-گۋمانيتارلىق سالادا دا ماڭىزدى رەفورمالار جۇزەگە استى - ەرلان قارين
وسىدان ءبىر جىل بۇرىن وتكەن كەزەكتەن تىس پرەزيدەنت سايلاۋىندا قاسىم-جومارت توقايەۆقا سايلاۋشىلاردىڭ 80 پايىزى داۋىس بەردى. بۇل كورسەتكىش حالىقتىڭ پرەزيدەنتكە دەگەن سەنىمى جوعارى ەكەنىن ايقىن اڭعارتتى.
مەملەكەتتىك كەڭەسشى ەرلان قارين وسىنداي پىكىردە، دەپ حابارلايدى Kazinform.
ول مەملەكەت باسشىسى 2019-جىلى جۇزەگە اسىرا باستاعان اۋقىمدى ءارى جان-جاقتى رەفورمالار قايتا سايلانعاننان كەيىن دە دايەكتى تۇردە جالعاسىن تاپقانىن اتاپ ءوتتى.
«پرەزيدەنت سايلاۋى جاڭا ساياسي ناۋقاندار كەزەڭىنە جول اشتى. سونىڭ ناتيجەسىندە پارلامەنتتىڭ قوس پالاتاسىنىڭ جانە ءماسليحاتتىڭ سايلاۋى ءوتىپ، ولاردىڭ قۇرامى ەداۋىر جاڭاردى.
ءۇش اپتا بۇرىن قازاقستاندا العاش رەت اۋدان جانە وبلىستىق ماڭىزى بار قالا اكىمدەرىنىڭ سايلاۋى بولدى.
وسىلايشا، ەلىمىزدىڭ ساياسي جۇيەسىن دەموكراتيالىق جولمەن وزگەرتۋ ۇدەرىسى ۇزدىكسىز جالعاسىپ كەلەدى»، - دەپ جازدى ەرلان تىنىمباي ۇلى جەلىدەگى پاراقشاسىنا.
ونىڭ پايىمىنشا، پرەزيدەنت قاسىم-جومارت توقايەۆتىڭ ستراتەگيالىق باعدارى قازاقستان قوعامىنىڭ بارلىق سالاسىن قاناتتاستىرا رەفورمالاۋعا باعىتتالعان. سوندىقتان پرەزيدەنت ءوزىنىڭ قىركۇيەكتەگى جولداۋىندا ەلىمىزدىڭ جاڭا ەكونوميكالىق مودەلگە كوشەتىنىن جاريالادى.
«بۇل قادام ەكونوميكانى ودان ءارى مونوپولياسىزداندىرۋ مەن ءارتاراپتاندىرۋدى، ونەركاسىپتى، اۋىل شارۋاشىلىعىن، كولىك پەن لوگيستيكانى، قارجى سالاسىن دامىتۋدى، شاعىن جانە ورتا بيزنەسكە جۇيەلى قولداۋ كورسەتۋدى كوزدەيدى.
ساياسي جانە ەكونوميكالىق رەفورمالارمەن قاتار الەۋمەتتىك-گۋمانيتارلىق سالادا دا ماڭىزدى رەفورمالار جۇزەگە اسىرىلادى. ونداعى ماقسات - ءبىلىم بەرۋ، عىلىم جانە مادەنيەت سالاسىن دامىتۋ ارقىلى ۇلتتىڭ جاڭا ساپاسىن قالىپتاستىرۋ»، - دەلىنگەن جازبادا.
ەرلان قارين پرەزيدەنتتىڭ سايلاۋ الدىنداعى تۇعىرناماسىندا ايتىلعان باستى باستامالار بيىل جۇزەگە اسىرىلا باستاعانىن ەسكە سالدى. ونىڭ قاتارىندا «ۇلتتىق قور - بالالارعا» جوباسى، «اۋىل اماناتى» باعدارلاماسى، زاڭسىز جولمەن الىنعان جانە شەتەلگە شىعارىلعان اكتيۆتەردى ەلگە قايتارۋ سياقتى باستامالار بار.
«جالپى، پرەزيدەنت ستراتەگياسىنىڭ بارلىق باعىتى - ساياسات، ەكونوميكا جانە يدەولوگيا ۇشەۋى بىرىككەندە ەلىمىزدى جۇيەلى تۇردە جاڭعىرتۋدى كوزدەيتىن ءبىرتۇتاس باعدارلامانى قۇرايدى»، - دەدى مەملەكەتتىك كەڭەسشى.
