ساياسات نۇربەك قازاق عىلىم سالاسىنىڭ مۇشكىل حالگە تاپ بولۋ سەبەپتەرىن اتادى

«عىلىم سالاسىندا 1 جىلدىڭ ىشىندە اتقارىلعان جۇمىستاردى 4-5 ۇلكەن باعىتقا بولۋگە بولادى. ءبىرىنشى باعىت - عىلىمدى باسقارۋ نەمەسە اكىمشىلىك جۇيەسى. وكىنىشكە وراي، سوڭعى 20-30 جىلدا عىلىم سالاسى وتە قيىن، مۇشكىل جاعدايعا تاپ بولدى. نەلىكتەن؟ ەڭ الدىمەن 90-جىلدارى قارجىلاندىرۋ توقتاپ قالدى. ءبىر عانا فاكتى كەلتىرەيىن. 90-جىلدارى، ك س ر و كەزىندە رەسپۋبليكانىڭ ىشكى جالپى ءونىمىنىڭ 0,84 پايىزى، ياعني، 1 پايىزعا جۋىعى عىلىمعا بولىنگەن. بۇل - جالپى حالىقارالىق تاجىريبەدەگى نەگىزگى باستى ۇستانىم. عىلىمىڭىزدى دامىتقىڭىز كەلسە، كەمىندە ءى ج ءو- ءنىڭ 1 پايىزىن ءبولۋ تۇرۋ كەرەك. 90-جىلداردىڭ باسىندا كەلگەن ەكىنشى ۇلكەن سوققى ك س ر و كەزىندە قازاقستاندا رەسمي تىركەلگەن 52 مىڭ عىلىمي زەرتتەۋشى قىزمەتكەر بولعان ەدى. 2000- جىلدارى، 10 -جىلدىڭ ىشىندە 12 مىڭ عانا عىلىمي قىزمەتكەر كەتىپ قالدى. ياعني، 40 مىڭعا جۋىق عالىمىمىزدى جوعالتتىق. ءتۇرلى سەبەپتەرى بار. نارىققا، بيزنەسكە، ءتۇرلى كومپانيالارعا، مەملەكەتتىك قىزمەتكە، شەتەلگە كەتتى. ياعني بۋىن ساباقتاستىعى ءۇزىلدى. ءبىرىنشى بۋىن ساتبايەۆتار، ەكىنشى بۋىن ايتقوجيندار بولسا، ولاردىڭ 80-90 -جىلدارى عىلىم ساحناسىنا شىققان ءۇشىنشى بۋىن شاكىرتتەرىن 90 -جىلدارى جوعالتىپ الدىق»، - دەدى مينيستر Jibek Joly تەلەارناسىنىڭ «ۋادە» باعدارلاماسىنا بەرگەن سۇحباتىندا.

ونىڭ اتاپ وتۋىنشە، بىرنەشە عىلىمي مەكتەبىمىزدى جوعالتۋ دا ۇلكەن سوققى بولدى.

«60-70-80-جىلدارى قالىپتاسقان مەتاللۋرگيا، اۋىل شارۋاشىلىعى، گەنەتيكا، سەلەكسيا، ميكروبيلولوگيا سالاسىنداعى عىلىمي مەكتەپتەر قاتتى السىرەدى نەمەسە جوعالدى. سوندىقتان دا مينيسترلىكتىڭ بولىنگەنى (ءبىلىم جانە عىلىم مينيسترلىگىنىڭ وقۋ- اعارتۋ، عىلىم جانە جوعارى ءبىلىم مينيترلىكتەرىنە ءبولىنۋى) وتە دۇرىس شەشىم بولدى. شىن مانىندە ءقازىر عىلىمي زەرتتەۋ ينستيتۋتتارىمەن ناقتى كۇندەلىكتى اينالىسۋعا ۋاقىت تا، رەسۋرس تا بار. ماسەلەن، 1 -جىلدىڭ ىشىندە بۇكىل عىلىمي- زەرتتەۋ ينستيتۋتتارىن، مەملەكەتتىك ج و و- لاردى ارالاپ شىقتىم»، - دەدى ساياسات نۇربەك.

مينيسترلىك پرەزيدەنت جانىنان عىلىم جانە تەحنولوگيالار جونىندەگى كەڭەس قۇرىلعانىن، بۇل حالىقارالىق تاجىريبەدە كوپتەگەن ەلدە بار ەكەندىگىن ايتادى.

«ياعني، قازىر عالىمدار تىكەلەي پرەزيدەنتپەن سويلەسۋگە، ءوز ۇسىنىستارىن ەنگىزۋگە مۇمكىندىك الىپ وتىر. ءبىرىنشى وتىرىسىمىز 12-ساۋىردە ءوتتى. ەندى ەكىنشى وتىرىسقا دايىندالىپ جاتىرمىز. ۇلتتىق عىلىم اكادەميامىز دا جاڭا مارتەبەسىن الدى. مىقتى عالىم كۇنسۇلۋ زاكاريا پرەزيدەنت بولىپ تاعايىندالدى. جالپى، بۇرىن السىرەپ قالعان ۇلتتىق عىلىم اكادەميامىزدى قالپىنا كەلتىرۋ جۇمىسىن جۇرگىزىپ جاتىرمىز. پرەزيدەنت قازىر تىكەلەي اكادەمياعا نازار اۋدارىپ، تاپسىرمالار بەرىپ وتىر. ءوزىنىڭ بولەك بيۋدجەتى، مارتەبەسى بار»، - دەدى ول.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى