ساياسات نۇربەك: ەنداۋمەنت قور تۋرالى زاڭنىڭ نازاربايەۆ قورلارىنا قاتىسى جوق
استانا. KAZINFORM - عىلىم جانە جوعارى ءبىلىم ءمينيسترى ساياسات نۇربەك ماجىلىستە تالقىلانىپ ەنداۋمەنت قورلار تۋرالى زاڭ جوباسىنىڭ نازاربايەۆ قورلارىنىڭ جۇمىسىنا قالاي اسەر ەتەتىنىن ايتتى.
- مىسالى، نازاربايەۆ ۋنيۆەرسيتەتى، نازاربايەۆ مەكتەپتەرىنىڭ قورلارى بولەك زاڭمەن رەتتەلگەن. وسىنىڭ ءبارىن تەكسەرىپ، مىقتى، تابىستى، قالىپتاسقان ەنداۋمەنت قورلارعا بۇل زاڭ كىرىسپەيدى. ولار وزدەرىنىڭ زاڭدارىمەن نەمەسە وزدەرىندە قالىپتاسقان پراكتيكانى ساقتايدى. ونى ءبىز بولەك تالقىلاپ، وسىلاي كەلىستىك، - دەدى مينيستر.
ءماجىلىستىڭ جالپى وتىرىسىندا ەنداۋمەنت قورلاردىڭ جۇمىسىن رەتتەيتىن زاڭ جوباسى ءبىرىنشى وقىلىمدا تالقىلانىپ جاتىر.
قۇجاتتى دەپۋتاتتارعا عىلىم جانە جوعارى ءبىلىم ءمينيسترى ساياسات نۇربەك ەنداۋمەنت تانىستىردى.
- ەنداۋمەنت قورىن قولداۋشىلاردى، دونورلاردى ىنتالاندىرۋ ءۇشىن ارنايى سالىق جەڭىلدىكتەرىن بەرۋ ۇسىنىلدى. دەپۋتاتتاردىڭ قولداۋىمەن قازىرگى تاڭدا ماجىلىستە قارالىپ جاتقان سالىق كودەكسىندە سالىمشىلاردىڭ ەنداۋمەنت قورعا سالعان جارناسىن 100 پايىز سالىقتان بوساتۋ تۋرالى نورما ەنگىزىلدى، - دەدى ول.
ءماجىلىس ەنداۋمەنت قور تۋرالى زاڭ جوباسىن ءبىرىنشى وقىلىمدا ماقۇلدادى.
قۇجاتتى تانىستىرعان عىلىم جانە جوعارى ءبىلىم ءمينيسترى ساياسات نۇربەك بۇل قۇجات ەلدەگى قايىرىمدىلىق مادەنيەتىنىڭ دەڭگەيىن كوتەرەتىنىنە سەنىمدى.
- زاڭ جوباسىنىڭ تاعى ءبىر ماقساتى - قوعامدا قايىرىمدىلىق مادەنيەتىن قالىپتاستىرۋ. قازىرگى تاڭدا ءوزىمىز كورىپ وتىرمىز، كوپتەگەن قور اشىلىپ جاتىر. ءتۇرلى-ءتۇرلى سەبەپتەرگە، باتىردىڭ قۇرمەتىنە، تانىمال تۇلعانىڭ قۇرمەتىنە، كوشە اتاۋىن وزگەرتۋگە ارنالعان قورلار اشۋ ادەتكە اينالدى. شىن مانىندە قايىرىمدىلىق - جاقسى نارسە. سەنىمدىلىك، باۋىرمالدىق جاعىنان پايدالى. ءبىراق ونى ءبىر جۇيەگە كەلتىرۋ كەرەك. ەنداۋمەنت قور تۋرالى زاڭ قولدانىسقا ەنگەن كەزدە وسىنداي قورلار ءۇشىن دە اشىق پرينتسيپتەرگە نەگىزدەلگەن، قۇرىلتايشىلار مەن سالىمشىلار اۋديت جۇرگىزە الاتىن پلاتفورما قالىپتاسادى، - دەدى ساياسات نۇربەك.
ايتۋىنشا، قۇجاتتا ەنداۋمەنت قور قۇرۋعا بولاتىن سالالار بەلگىلەندى.
- بۇل - ءبىلىم بەرۋ، دەنساۋلىق ساقتاۋ، بۇقارالىق سپورت جانە مادەنيەت سالالارى. وسى سالالاردان قازىرگى تاڭدا بيۋدجەتكە ۇلكەن اۋىرتپالىق ءتۇسىپ جاتىر. سوندىقتان بۇل زاڭنىڭ قابىلدانۋى بيۋدجەتكە كىشكەنە جەڭىلدىك بەرىپ، جەكە ينۆەستورلاردىڭ قاراجاتىن الەۋمەتتىك ماسەلەلەرگە باعىتتاۋعا مۇمكىندىك اشىلار ەدى، - دەدى مينيستر.
قۇجاتتا ەنداۋمەنت قورعا سالعان جارنالاردى سالىقتان بوساتۋ ۇسىنىلعان.
ەسكە سالساق، وقىرمان نازارىنا اتالعان زاڭ جوباسىنىڭ باستى جاڭاشىلدىقتارى تۋرالى سۇحبات ۇسىنعان ەدىك.
سپيكەر قازاقستاندا ءدال قازىر نەشە ەنداۋمەنت قور بار، «ەنداۋمەنت قور تۋرالى» زاڭ قابىلداۋعا قانداي قاجەتتىلىك تۋىنداپ وتىر دەگەن ساۋالدارعا جاۋاپ بەردى.
اۆتور
ەسىمجان ناقتىباي
