ساۋساقتار قاتتى توڭادى: اقتاۋلىق مورج قىستا تەڭىزگە ءتۇسۋدىڭ ادىستەرىن ءبولىستى

قازىر جاسى - 27 دە. سوڭعى 5 جىلدان بەرى ول قىستا دا تەڭىزگە شومىلۋدى ادەتكە اينالدىرعان.

- تاڭدا تەڭىز جاقتا جۇگىرەتىنمىن، سول كەزدە قىستا تەڭىزگە ءتۇسىپ جاتقان ءبىر توپ ۇلكەن كىسىنى كورەتىن ەدىم. ولارعا قاراپ ومىرگە قۇلشىنىسىن سەزەتىنمىن. ەنەرگياسى تاسىپ، اۋراسى ەرەكشە بولدى. سودان كەيىن نە ءۇشىن تۇسەدى، قانداي پايداسى بار دەپ ينتەرنەتتەن ىزدەي باستادىم. ۋاقىت وتە كەلە ەر ادامعا وتە كوپ پايداسى بارىن ءتۇسىندىم، - دەيدى ەلامان تولەيەۆ.

سالقىن سۋعا تۇراقتى تۇسكەننىڭ ارقاسىندا ول 5 جىلدان بەرى تۇماۋ سياقتى ماۋسىمدىق اۋرۋلاردى ۇمىتقان.

- قىستا سۋعا ءتۇسۋ تەستوستەرون دەگەن ەڭ ماڭىزدى گورموندى كوتەرەدى. تەرىنى قاتايتادى. مەن ءوزىم فۋتبول وينايمىن، بۇلشىق ەتتى قالپىنا كەلتىرەدى. شارشاپ تۇرساڭ، ەنەرگيا بەرەدى. سەبەبى دوفامين ءبولىنىپ، ءوزىڭدى كۇشتى سەزىنەسىڭ. قان اينالىمىنا دا جاقسى. ينفاركت، ينسۋلتتىڭ الدىن الۋعا كومەكتەسەدى. قازىر كوپ ادامدا ارتىق سالماق بار، سوعان پايدالى. ويتكەنى سالقىن سۋعا كىرگەندە قوڭىر ماي ءبولىنىپ، اق مايدى جويادى، - دەيدى ول.

ايتۋىنشا، قىستا تەڭىزگە ءتۇسۋ وڭاي ەمەس. ءول ۇشىن كۇندەلىكتى تەڭىزگە بارا جاتقاندا ءوزىڭدى مورالدى تۇرعىدا دايىنداۋىڭ قاجەت. ادەتكە اينالدىرۋ ادامنىڭ ەرىك- جىگەرىنە بايلانىستى.

-ءبىز اقتاۋدا اۋا رايىنا قاراماستان تەڭىزگە شومىلا بەرەمىز. كاسپييدىڭ سۋى مۇز بولىپ قاتپاسا دا سالقىن بولىپ تۇرادى. وعان دالەل رەتىندە ايتايىن، مينۋس 20 گرادۋستا كولسايعا تۇسكەنمىن. ءبىراق ول كاسپيدەن سالقىن بولمادى. ورال قالاسىندا مۇزعا ءتۇسىپ جۇرگەن ادامدار دا كاسپيدىڭ سۋى سالقىن دەپ ايتادى، - دەيدى ەلامان.

قازىرگى تاڭدا اقتاۋدا قىستا تەڭىزگە تۇسەتىن 100-دەن استام ادام بار. سونىڭ باسىم بولىگى تۇراقتى شومىلادى.

ەلامان تولەيەۆ بالا كەزدەن تەڭىزدە ءجۇزىپ ۇيرەنگەندىكتەن تولقىنعا دا قاراماي تۇسە بەرەدى.

- مورجدار كوبەيىپ كەلەدى. قازىر جاستار دا، جاسى ۇلكەندەر دە تۇسەدى. دەنساۋلىعىنا جانى اشيتىن، كۇتىممەن قارايتىن ادامدار پايداسىن ءتۇسىندى. ارينە تولقىن تۋلاپ تۇرعاندا قاۋىپتى بولادى. ءبىراق جاستايىمىزدان ءتۇسىپ ۇيرەنگەن سوڭ تولقىنعا كىرە بەرەمىز. تاسقا ۇرىنبايىن دەپ ساقتانىپ جۇرەمىز. پايداسى بار ەكەنىن ءبىلىپ، ەم بولسىن دەپ بارعاسىن با، سودان كۇش الامىز. جالپى قاۋىپتى. ساۋساقتار مەن باقايلار قاتتى توڭىپ قالادى. ونىڭ ۇستىنە ماڭعىستاۋدا جەل قاتتى عوي، تەرموسپەن ىستىق سۋ اپارىپ، قولدارىمىزدى شايىپ، تەز-تەز كيىنىپ الامىز، - دەيدى ول.

وكىنىشكە قاراي، كاسپي تەڭىزىنىڭ تارتىلۋى مورجدارعا دا اسەر ەتكەن. ولار ۇيرەنگەن اۋماقتاردان كەتىپ، ىڭعايلى جاعالاۋ ىزدەۋگە ءماجبۇر.

- تەڭىزدىڭ تارتىلعانى وتە قايعىلى جاعداي. مەن ءوزىم تەڭىزگە سەكىرگەندى جاقسى كورەمىن. سول سەكىرەتىن جەرلەرىمىز تايىز بولىپ كەتتى. قازىر سەكىرە المايمىز، - دەيدى ەلامان تولەيەۆ.

بۇعان دەيىن كاسپي تەڭىزىنىڭ جاعالاۋدان الىستاپ بارا جاتقانىن جازعان بولاتىنبىز.

اۆتور

اياگوز ءىزباساروۆا

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى