سارىاعاشتىق وقۋشىعا پرەزيدەنت سىيلىق جولدادى
تۇركىستان. KAZINFORM - سارىاعاش اۋدانىنداعى س. تورايعىروۆ مەكتەبىنىڭ 4-سىنىپ وقۋشىسى حيۋاز ارشاباي ەل پرەزيدەنتىنەن ارنايى سىيلىق الدى.
الەۋمەتتىك جەلىدەن «پرەزيدەنت بالالاردىڭ ارمانىن ورىندايدى» دەگەن جازبانى وقىعان ول، ءوز ارمانىن حاتقا ءتۇسىرىپ، مەملەكەت باسشىسىنا جولداعان. ارادا ءبىرشاما ۋاقىت وتكەندە جەتكىنشەك قاسىم- جومارت توقايەۆتىڭ سىيلىعىنا يە بولدى.
حيۋاز - كوپبالالى وتباسىنداعى التىنشى قىزى. ول تەك وقۋ ۇلگەرىمى جاعىنان عانا ەمەس، شىعارماشىلىق جانە ينتەلەكتۋالدىق قابىلەتتەرىمەن دە ەرەكشەلەنەدى. باۋىرلارىنىڭ بارلىعى دا ونەر- بىلىمگە ءبىر تابان جاقىن، ىزدەنىمپاز.
پرەزيدەنتكە جازعان حاتىندا جەتكىنشەك باۋىرلارىنا نوۋتبۋك سۇراعان. سونىمەن قاتار مەملەكەت باسشىسىمەن كەزدەسۋدى قالايتىنىن جەتكىزىپتى.
ارنايى حيۋاز ارشاباي ءۇشىن ەلوردادان كەلگەن سىيلىقتى تۇركىستان وبلىستىق ءبىلىم باسقارماسىنىڭ ماماندارى تابىستادى. پرەزيدەنتتىڭ بۇل جاۋابى حيۋازدى ۇلكەن قۋانىشقا كەنەلتتى.
ايتا كەتەيىك، بۇدان بۇرىن اۋىل مەن قالا مەكتەبىندەگى ءبىلىم الشاقتىعى قايتكەندە جوعالاتىنىن جازعان بولاتىنبىز.
