سارىاعاشتاعى 5 جاسار قىزدىڭ ءولىمى: وقيعاعا كامەلەتكە تولماعان جەرلەسىنىڭ قاتىسى بولۋى مۇمكىن
تۇركىستان. KAZINFORM - دارەتحانادان تابىلعان 5 جاستاعى قىزدىڭ ولىمىنە قاتىستى تەرگەۋ جالعاسىپ جاتىر. تۇركىستان وبلىسى پوليتسيا دەپارتامەنتىنىڭ باسپا ءسوز قىزمەتى وقيعاعا قاتىستى تىڭ مالىمەتتى جاريالادى.
پوليتسيا قىزمەتكەرلەرى تەرگەۋ ءىس-شارالارى بارىسىندا اتالعان وقيعاعا كامەلەتكە تولماعان كۇدىكتىنىڭ قاتىسى بولۋى مۇمكىن ەكەندىگىن انىقتادى. انىقتالعان جاعدايلارعا بايلانىستى جانە كۇدىكتىنىڭ پسيحولوگيالىق جاعدايىن ەسكەرە وتىرىپ، ول مامانداندىرىلعان مەديتسينالىق مەكەمەگە ورنالاستىرىلدى.
«قازىرگى ۋاقىتتا ءىستىڭ بارلىق ءمان-جايلارىن تولىق جانە جان-جاقتى انىقتاۋعا باعىتتالعان سوتقا دەيىنگى تەرگەۋ جۇمىستارى ءجۇرىپ جاتىر. پوليتسيا اقيقاتتى انىقتاۋعا جانە زاڭدى شەشىم قابىلداۋعا بار كۇشىن سالادى»، - دەلىنگەن تۇركىستان وبلىسىنىڭ پوليتسيا دەپارتامەنتى باسپا ءسوز قىزمەتى تاراتقان اقپاراتتا.
ايتا كەتەيىك، بۇدان بۇرىن سارىاعاش اۋدانىندا 5 جاسار قىزدىڭ دەنەسى دارەتحانادان تابىلعان بولاتىن.
