سارىاعاشتا 7 جىلعا سوتتالعان ۇلى بريتانيا ازاماتى اقتالىپ شىقتى
سارىاعاشتا 7 جىلعا سوتتالعان ۇلى بريتانيا ازاماتى اقتالىپ شىقتى، دەپ حابارلايدى Kazinform.
تۇركىستان وبلىستىق سوتىنىڭ قىلمىستىق ىستەر جونىندەگى سوت القاسى تەرگەۋ كەزىندە شەتەل ازاماتىنىڭ قۇقىقتارى بۇزىلعانىن انىقتادى.
قالتا اميانىندا پسيحوتروپتى زات الىپ ءجۇردى دەپ ايىپتالعان شەتەلدىككە تاعىلعان ايىپ تولىعىمەن الىندى.
تۇركىستان وبلىستىق سوتىنىڭ قىلمىستىق ىستەر جونىندەگى سوت القاسىنىڭ قاۋلىسىمەن ءبىرىنشى ساتىداعى سوتتىڭ ايىپتاۋ ۇكىمى جويىلىپ، سوتتالۋشىنى اقتاۋ جونىندە جاڭا ۇكىم شىقتى.
سونىمەن قاتار، سوت القاسى شەكارا قىزمەتكەرلەرىنىڭ ءىس ارەكەتىن تەكسەرۋ جونىندە جەكە قاۋلى قابىلدادى.
سوعان ساي باس پروكۋراتۋرا قىزمەتتىك تەكسەرۋ جۇرگىزىپ، قابىلدانعان شارالار جونىندە ءبىر اي ىشىندە سوتقا حابارلاۋعا ءتيىس.
ايتا كەتەيىك، كەشە سارىاعاشتا 7 جىلعا سوتتالعان ۇلى بريتانيا ازاماتى اپەللياتسيالىق شاعىم بەرگەنىن جازعان بولاتىنبىز.
