ساقاردان سابىن قايناتادى: ش ق و- لىق اجە جاساعان تابيعي سابىننىڭ ەمدىك قاسيەتى مول

ءبيباتيما ىبىرايحان زايسان اۋدانى قاينار اۋىلىندا تۇرادى. سابىن جاساۋدىڭ ۇلتتىق ءادىسىن شەشەسىنەن ۇيرەنگەن. بيىل 67-گە تولدى، ال ساقاردان سابىن قايناتىپ جۇرگەنىنە 51 جىل بولعان.

«ول كەزدە 16 جاستا ەدىم. انامىز سابىن جاساۋدىڭ قىر- سىرىنا قانىقتىردى. بۇرىن قازىرگىدەي ۇنتاق دەگەن بولمادى عوي. كىردى دە سابىنمەن جۋاتىنبىز، - دەيدى. - سابىن جاساۋ ادىسىنە توقتالار بولساق، اۋەلى الابوتا ءشوبىن شاۋىپ، جينايمىز. ودان كەيىن ونى ورتەپ، كۇلىن سۋعا قايتاتامىز. سودان شىعاتىن اق ۇنتاق ساقار دەپ اتالادى. ساقارعا سيىر نەمەسە قوي مايىن قوسىپ 1 ساعاتتاي قايناتقان سوڭ قالىپقا سالىپ قاتىرىپ قويامىز. ءسويتىپ سابىن دا دايىن بولادى».

تابيعي سابىننىڭ ەمدىك قاسيەتى مول. ماسەلەن، جاڭا تۋعان شاقالاقتى قىرقىنان شىققانشا ۇزبەي سابىن قوسىلعان سۋعا شومىلدىرسا تالاي اۋرۋدىڭ الدىن الادى. ىستىعى كوتەرىلسە سابىندى شەكەسىنە، قۇلاقتىڭ الدىنا، ەكى وكپەسىنە جاعۋ كەرەك. سوندا ىستىعى دەرەۋ باسىلادى.

«كەيبىر ادامداردا باسى قىشىپ، شاشى ءتۇسىپ جاتادى. سوندا باستى وسى سابىنمەن جۋۋ كەرەك. اللەرگياعا دا جاقسى. بەتتەگى بەزەۋگە، قول- اياق جاراسىنا ەم بولادى. ايتا بەرسەڭ كوپ. ەشقانداي قوسپا جوق، تازا ءونىم بولعاندىقتان پايداسى زور. مال جاراسىنا جاعۋعا دا كەلەدى»، - دەيدى ءبيباتيما ىبىرايحان.

تاس سياقتى قاتتى سابىن سۋ تيسە جىلدام ەرىپ، جۇپ- جۇمساق بولادى. بەتىنە كۇتىم جاسايتىن ايەلدەر وسى سابىنمەن جۋىنعاننان كەيىن بەت تەرىسىنىڭ جۇمسارىپ، اجارلانىپ قالاتىنىن ايتادى ەكەن. كولىك جوندەيتىن ازاماتتار بولسا، مايلانعان قولدى دۇكەننىڭ سابىنى دۇرىس تازارتپايتىنىن، ال ساقاردان جاسالعان وسى سابىننىڭ مايدى دەرەۋ كەتىرەتىنىن ايتىپتى.

«سابىن جاساۋعا 2 ساعاتتاي ۋاقىت كەتەدى. ءبىر جاساعاندا 30 سابىن شىعادى. تاپسىرىسقا بايلانىستى جاساپ تۇرامىن. قازىر ماي قىمباتتاپ كەتكەندىكتەن ءوزىم دە باعانى كوتەردىم. ءبىر سابىن - 2000 تەڭگە. ەگەر 30 سابىننان جوعارى السا، وندا 1500 تەڭگەدەن ساتامىن»، - دەيدى سابىن جاساۋشى.

قاينار اۋىلىندا جاسالاتىن سابىنعا وبلىستاعى قالا، اۋىل حالقىنان بولەك استانا، الماتى، قاراعاندى، اقتوبە قالالارىنان تاپسىرىس ءتۇسىپ تۇرادى. كوبى 50 سابىننان ساتىپ الادى ەكەن. اجە سابىندى ولارعا پوشتا ارقىلى سالىپ جىبەرەدى.

«ەشقاي جەرگە جارناما جاسامايمىن. ينتەرنەت دەگەندى مۇلدە بىلمەيمىن. حالىق ءبىر- بىرىنەن ەستىپ، حابارلاسىپ جاتادى. ماعان وسىنداعى ەكى ۇلىم كومەكتەسەدى. ولارعا دا سابىن قايناتۋدى ۇيرەتتىم. جالپى ءوزىمنىڭ 9 بالام بار. 24 نەمەرە، 2 شوبەرە ءسۇيىپ وتىرمىن»، - دەيدى ءبيباتيما ىبىرايحان.

فوتو: ب. ىبىرايحاننىڭ جەكە مۇراعاتىنان

اۆتور

تالعاتجان مۇحامەتبەك ۇلى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى