سامات ابىشكە قاتىستى تەرگەۋ امالدارىنا ىشكى ىستەر جاۋاپ بەرمەيدى - ەرجان سادەنوۆ
ىشكى ىستەر ءمينيسترى ەرجان سادەنوۆ ۇلتتىق قاۋىپسىزدىك كوميتەتى ءتوراعاسىنىڭ بۇرىنعى ءبىرىنشى ورىنباسارى سامات ابىشكە قاتىستى تەرگەۋ بويىنشا تۇسىنىك بەردى، دەپ حابارلايدى قازاقپارات ءتىلشىسى.
بۇگىن پارلامەنت ماجىلىسىندە تىلشىلەر مينيستردەن سامات ابىشكە قاتىستى تەرگەۋ جۇرگىزۋ تاقىرىبىندا سۇراق قويدى. «نە سەبەپتى قۇزىرلى ورگاندار «قاڭتار وقيعاسى» كەزىندە ونى جاۋاپقا تارتپادى؟» دەپ سۇرادى جۋرناليستەر.
ە. سادەنوۆ بۇل تەرگەۋ ىشكى ىستەر مينيسترلىگىنىڭ قۇزىرىندا ەمەس ەكەنىن ايتتى.
«بۇل تەرگەۋ امالدارىمەن ارنايى پروكۋرورلار اينالىسىپ جاتىر. سوندىقتان ءبىز ەشقانداي اقپارات بەرە المايمىز جانە ىشكى ىستەر مينيسترلىگىنىڭ بۇل تاقىرىپتا جاۋاپ بەرۋى دۇرىس ەمەس»، - دەدى مينيستر.
بۇل تۇرعىدا ۆەدومستۆو باسشىسى اتالعان تەرگەۋ امالدارى اياسىندا ارنايى پروكۋرورلار ءتيىستى شەشىم جاسايتىنىن ايتتى.
بۇدان بۇرىن حابارلانعانداي، باس پروكۋراتۋرانىڭ ارنايى پروكۋرورلارى ۇلتتىق قاۋىپسىزدىك كوميتەتى ءتوراعاسىنىڭ بۇرىنعى ءبىرىنشى ورىنباسارى سامات ابىشكە قاتىستى «قاڭتار وقيعالارى» كەزىندە بيلىك پەن لاۋازىمدىق وكىلەتتىگىن اسىرا پايدالانۋ فاكتىسى بويىنشا سوتقا دەيىنگى تەرگەپ-تەكسەرۋ جۇمىستارىن جۇرگىزىپ جاتىر.
