سامات ابىشكە قاتىستى قىلمىستىق ءىستى تەرگەۋ اياقتالدى

«قازاقستان رەسپۋبليكاسى باس پروكۋراتۋراسىنىڭ سوتقا دەيىنگى تەرگەپ-تەكسەرۋ قىزمەتى س. ابىشكە قاتىستى قىلمىستىق ءىستى تەرگەۋدى اياقتاعانىن حابارلايمىن. ق ر قىلمىستىق كودەكسىنىڭ 362-بابىنىڭ 4-بولىگى بويىنشا ءىس قوزعالىپ، سوتقا جولداندى»، - دەلىنگەن اتالعان قىزمەتتىڭ باسشىسى ريزابەك وجاروۆتىڭ Kazinform اگەنتتىگىنە بەرگەن رەسمي جاۋابىندا.

وسى قىلمىستىق ءىس اياسىندا سامات ءابىش اۋىر سالدارعا اكەپ سوقتىرعان بيلىگىن جانە قىزمەتتىك وكىلەتتىگىن اسىرا پايدالاندى دەگەن كۇدىككە ىلىنگەن. كۇدىكتىگە قاتىستى ەشقايدا كەتپەۋ تۋرالى بۇلتارتپاۋ شاراسى قابىلدانعان. ول قازىر قازاقستان اۋماعىنان شىقپاعان.

«قىلمىستىق ىستە مەملەكەتتىك قۇپيالاردى قامتىعان مالىمەتتەر بار ەكەنىن ەسكەرە وتىرىپ، سوتقا دەيىنگى تەرگەپ-تەكسەرۋ دەرەكتەرى جاريا ەتىلمەيدى»، - دەپ اتالىپ وتكەن حابارلامادا.

بۇدان بۇرىن حابارلانعانداي، 2023-جىلى 19-قىركۇيەكتە سامات ابىشكە قاتىستى تەرگەۋ ءجۇرىپ جاتقانى حابارلاندى.

ايتا كەتەيىك، سامات ءابىش - تۇڭعىش پرەزيدەنت نۇرسۇلتان نازاربايەۆتىڭ نەمەرە ءىنىسى. 2015-جىلدان باستاپ قاڭتار وقيعاسىنا دەيىن، ياعني 2022-جىلدىڭ قاڭتارىنا دەيىن ۇلتتىق قاۋىپسىزدىك كوميتەتى ءتوراعاسىنىڭ ءبىرىنشى ورىنباسارى قىزمەتىن اتقارعان.

اۆتور

رۋسلان عابباسوۆ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى