سالىق ورگاندارى نەگە بلوگەرلەردى تەكسەرە باستادى؟

TengriTV YouTube ارناسىنا بەرگەن سۇحباتىندا مەملەكەتتىك كىرىستەر كوميتەتى جەكە تۇلعالاردىڭ كىرىستەرىن اكىمشىلەندىرۋ باسقارماسىنىڭ باسشىسى دينا قۇسايىنوۆا سالىق ورگاندارىنا قازاقستاندىقتاردان شاعىم تۇسكەنىن مالىمدەدى.

«بۇل جۇمىستى كوپ شاعىم تۇسكەننەن كەيىن باستادىق. ازاماتتاردان «بلوگەرلەر ءسان-سالتاناتى كەلىسكەن ءومىر سۇرەدى، الايدا سالىق تولەمەيدى» دەگەن شاعىمدار، وتىنىشتەر تۇسەدى. «ولاردى تەكسەرىڭىزدەر، ولار وسىنداي كولىك مىنەدى، مىناداي پاتەرلەردە تۇرادى، مىناداي ۇيلەر ساتىپ الادى» دەيدى. ارينە، حالىقتا ولار قانشا سالىق تولەيدى دەگەن سۇراق تۋىندايدى»، - دەدى دينا قۇسايىنوۆا.

ول بلوگەرلەرگە حابارلامالار 2025-جىلعى اقپاندا 2022 جانە 2023-جىلدارداعى دەرەكتەردى تالداۋ ناتيجەسىندە جىبەرىلگەنىن ايتتى.

«ول كەزدە بلوگەرلەردىڭ كەيبىرەۋى سالىق دەكلاراتسياسىن ۇسىندى، كەيبىرەۋى ۇسىنبادى، كەيبىرەۋى نولدىك كورسەتكىشتەرى بار سالىق دەكلاراتسياسىن بەردى، سوندىقتان تالداۋ جاساپ، سايكەس كەلمەيتىن تۇستاردى انىقتادىق»، - دەدى مكك وكىلى.

كوپتەگەن بلوگەر قايىرىمدىلىققا، تۋعان كۇندەرگە اقشا جيناعانىن، تۋىستارىنا اقشا اۋدارعانىن ايتقان.

«قايىرىمدىلىق تۋرالى زاڭ بار. قايىرىمدىلىققا اقشا جيناعان كەزدە ۋاكىلەتتى ورگاندارعا سوماسى، قايىرىمدىلىقتى كىم جاسايتىنى تۋرالى ەسەپ ۇسىنىلۋى قاجەت. بىزگە وسى ەسەپتەر بەرىلسە، ەسكەرىلەدى. ەندى باسقا كىرىستەر تۋرالى ايتايىن: «قايىرىمدىلىق كومەك»، «دەمەۋشىلىك كومەك» دەگەن ۇعىمدار بار. مۇنىڭ ءبارى دە تابىس رەتىندە كورسەتىلۋى كەرەك، سودان كەيىن سالىق كودەكسىنە سايكەس تۇزەتىلۋى قاجەت. بۇلاي جاسالماسا، ولار قوسىمشا سالىق دەكلاراتسياسىن ۇسىنا الادى، مۇنىڭ ءبارى ەسكەرىلەدى. حابارلامالارعا 30 جۇمىس كۇنى ىشىندە جاۋاپ بەرۋى كەرەك. ءبىر جارىم ايعا جۋىق ۋاقىت جەتكىلىكتى»، - دەدى مەملەكەتتىك كىرىستەر كوميتەتىنىڭ وكىلى.

قازاقستاندىق بلوگەرلەردىڭ سىنىنا جاۋاپ رەتىندە دينا قۇسايىنوۆا بۇل ارەكەتتەردىڭ ماقساتى جازا ەمەس، مەملەكەتتىك بيۋدجەتتى تولتىرۋ ەكەنىن ايتتى.

«ءبىز مەملەكەتتىك بيۋدجەتتى تولتىرۋمەن اينالىسامىز. ءبىز ءۇشىن ول بلوگەر مە، جۋرناليست پە نەمەسە كاسىپكەر مە، بۇل جاعى ماڭىزدى ەمەس. بارلىعى سالىقتى دۇرىس ەسەپتەپ، مەملەكەتتىك بيۋجەتكە تولەۋى كەرەك»، - دەدى سالىق ورگانىنىڭ وكىلى.

سونىمەن قاتار، ول تەكسەرىس «جوعارىدان كەلگەن بۇيرىق» دەگەن پىكىرلەرگە قاتىستى بىلاي دەدى:

«حابارلامالار تەك اقپاندا جىبەرىلگەن جوق. بۇرىن دا حابارلامالار جىبەرىلگەن. باسقا بلوگەرلەر سالىق دەكلاراتسياسىن ءۇنسىز-ءتۇنسىز تولىقتىردى، سالىقتارىن تولەدى. ەگەر بىردەڭە دۇرىس بولماسا، بىزگە ءتۇسىندىرسىن، كەلىسپەيتىن دەرەكتەردى سالىستىرسىن».

ەسكە سالايىق، بۇعان دەيىن قازاقستاندىق بلوگەرلەرگە 53 ميلليارد تەڭگە تولەۋگە ءبىر اي ۋاقىت بەرىلدى. مەملەكەتتىك كىرىستەر كوميتەتى مالىمەتىنشە، 594 ادام كىرىسىن جالپى سوماسى 53,3 ميلليارد تەڭگەگە تومەندەتكەن.

ەندى بلوگەرلەر ناقتىلانعان سالىق ەسەبىن تاپسىرىپ، سالىق تولەۋى كەرەك نەمەسە 30 جۇمىس كۇنى ىشىندە تۇسىنىكتەمە بەرۋى قاجەت.

19-اقپاندا ق م ا ءتوراعاسىنىڭ ورىنباسارى سالىق ورگاندارى تەكسەرىستى اياقتاعانعا جانە زالالدىڭ ناقتى مولشەرىن انىقتاعانعا دەيىن ۆەدومستۆو بلوگەرلەرگە قاتىستى قىلمىستىق ءىستى ءوز بەتىنشە باستاي المايتىنىن مالىمدەدى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى