سالىق ورگاندارى 4 بلوگەردىڭ 2,2 ميلليارد تابىسىن تەكسەرەدى
استانا. KAZINFORM - مەملەكەتتىك كىرىستەر كوميتەتى سالىق تالابىن قانشا بلوگەر ورىنداماعانىن ءمالىم ەتتى.
ەستەرىڭىزگە سالا كەتسەك، كامەرالدىق باقىلاۋ ناتيجەسىندە كوميتەت 854 بلوگەرگە قاتىستى 2022-2023 -جىلدارى كەزەڭى ءۇشىن 71,9 ميلليارد تەڭگەگە تابىسىن تومەندەتۋىنە وراي 1586 حابارلاما جىبەرگەن.
بيىل 4 -ماۋسىمداعى جاعداي بويىنشا 394 بلوگەر قوسىمشا نىسان ۇسىنىپ، 11,8 ميلليارد كىرىستەرىن دەكلاراتسيالاعان. 0,64 ميلليارد تەڭگە سالىق تولەگەن.
- بۇگىندە كامەرالىق باقىلاۋدىڭ بۇعان دەيىن جىبەرىلگەن حابارلاماسىن ورىنداماعانى نەمەسە تولىق ورىنداماعانى ءۇشىن بلوگەرلەرگە قاتىستى سالىقتىق تەكسەرۋ تاعايىنداۋ ءىس-شارالارى جۇرگىزىلىپ جاتىر. بۇل رەتتە ولاردىڭ تورتەۋىنە قاتىستى 2,2 ميلليارد تەڭگە سوماسىنداعى كىرىستى تومەندەتۋ فاكتىسى بويىنشا تەكسەرۋ تۋرالى بۇيرىق ەنگىزىلدى، - دەدى كوميتەتتەن اگەنتتىكتىڭ رەسمي ساۋالىنا وراي.
وسى جىلدىڭ 23 -ساۋىرىندەگى جاعداي بويىنشا 338 بلوگەر 10 ميلليارد 585,4 ميلليون تەڭگە سوماسىنا كىرىستەردى دەكلاراتسيالاپ، 256,7 ميلليون تەڭگە سوماسىندا جەكە تابىس سالىعىن تولەگەن ەدى.
اۆتور
مارلان جيەمباي
