سالىق كوبەيسە، بيزنەس كولەڭكەگە كەتپەي مە - ۇلتتىق ەكونوميكا ءمينيسترى جاۋاپ بەردى
استانا. KAZINFORM - ەلىمىزدە سالىق سانى مەن كولەمى كوتەرىلسە، بيزنەس وكىلدەرى كاسىبىن كولەڭكەلەتىپ جىبەرمەي مە؟ بۇل ساۋالعا Kazinform اگەنتتىگىنىڭ پودكاستىندا پرەمەر-ءمينيستردىڭ ورىنباسارى - ۇلتتىق ەكونوميكا ءمينيسترى سەرىك جۇمانعارين جاۋاپ بەردى.
- سالىقتى كوتەرسە، بيزنەس كولەڭكەگە كەتەدى دەگەن پىكىردى تالاي ەستىدىم. قازاقستاننىڭ ىشىندە تىرشىلىك جاساپ جاتقان بيزنەستىڭ كولەڭكەگە كەتۋىنە ەشقانداي مۇمكىندىك جوق. تەك قولما-قول اقشامەن تولەسەڭ عانا، ەشكىم بىلمەيدى. ءبىراق، قاشانعى قولما-قول تولەيسىڭ، ونداي نارىقتى، ساتۋشىنى، ساتىپ الۋشىنى قايدان تاباسىڭ؟ ۇزاققا بارمايدى. نە دە بولسا ءموبيلدى اۋدارىمعا كوشەسىڭ، ول پروتسەستى سالىق كوميتەتى، ۇلتتىق بانك كورىپ وتىر، ەلەكتروندى شوت فاكتۋرا اشسا، بىردەن كورەمىز، - دەدى سەرىك جۇمانعارين سۇحبات بارىسىندا.
ۇلتتىق ەكونوميكا ءمينيسترىنىڭ مالىمدەۋىنشە، بۇگىندە سالىق جۇيەسى جاقسى دامىعان.
- سول سەبەپتى، تىعىلۋدىڭ قاجەتى جوق، تىعىلا دا المايسىڭ. بيزنەس جۇرگىزۋدىڭ ەكى جولى بار، ءبىرى - قازىرگى جولدان تايماۋ، ەشتەڭەنى وزگەرتپەۋ، ودان جاعداي جىل سايىن قيىنداي بەرەدى. سالدارىنان سالىق جينالمايدى، بۇكىل سالماق ۇلتتىق قورعا تۇسەدى، - دەيدى پرەمەر- ءمينيستردىڭ ورىنباسارى.
ايتا كەتەيىك، 9-ساۋىردە ءماجىلىس سالىق كودەكسىنىڭ جاڭا جوباسىن ءبىرىنشى وقىلىمدا ماقۇلدادى.
سالىق كودەكسىنىڭ جاڭا جوباسى بويىنشا سالىق ەسەبىن تاپسىراتىندار سانى 30 پايىزعا قىسقارادى.
ەسكە سالساق، قوسىلعان قۇن سالىعى سالىناتىن اينالىمنىڭ تومەنگى شەگى 40 ميلليون تەڭگە بولادى.
سونداي-اق سەرىك جۇمانعارين كورپوراتيۆتىك تابىس سالىعىنىڭ مولشەرلەمەسى وسەتىن سالالاردى اتادى.
