سادىر جاپاروۆ 2026 -جىلعا دەيىن شەنەۋنىكتەردىڭ ايلىعىن كوتەرۋگە تىيىم سالدى
استانا. KAZINFORM - قىرعىزستان پرەزيدەنتى مەملەكەتتىك قىزمەتكەرلەردىڭ جالاقىسىن كوتەرۋگە موراتوري ەنگىزدى. ءتيىستى قۇجات ۇكىمەتتىك «ەركين-توو» گازەتىندە جاريالاندى، دەپ حابارلايدى 24.kg.
تىيىم 2026 -جىلعا دەيىن ەنگىزىلگەن. اتاپ وتىلگەندەي، بۇل شەشىم مەملەكەتتىك بيۋدجەت شىعىندارىن وڭتايلاندىرۋ ماقساتىندا قابىلدانعان.
مەملەكەتتىك ۆەدومستۆو، كوميتەتتەر، پرەزيدەنتتىڭ وڭىرلەردەگى ۋاكىلەتتى وكىلدىكتەرى، سونداي-اق جەرگىلىكتى باسقارۋ ورگاندارى قىزمەتكەرلەرىنىڭ جالاقىسىن كوتەرۋگە تىيىم سالىنىپ وتىر.
سونداي-اق مەملەكەتتىك ورگانداردىڭ شتات سانىن كەڭەيتۋگە دە رۇقسات جوق.
مەملەكەتتىك قىزمەتكەرلەردىڭ جالاقىسىن، سونداي-اق شتات قۇرىلىمىن وزگەرتۋ ەرەكشە جاعدايلاردا مەملەكەت باسشىسىنىڭ جەكە شەشىمىمەن مۇمكىن بولادى.
موراتوري قىزمەتىن پرەزيدەنت پەن مينيسترلەر كابينەتى شەشىمدەرىنىڭ ورىندالۋىن باقىلاۋ ءبولىمى قاداعالاۋى ءتيىس.
اۆتور
زارينا تۋعانبايەۆا
