ساۋدا قاقتىعىسى: برازيليا ا ق ش تاۋارلارىنا قارسى شارا قولدانۋعا دايىن
استانا. KAZINFORM - برازيليا 1-تامىزدان باستاپ ا ق ش- تان كەلەتىن تاۋارلارعا باج سالىعىن ەنگىزەدى. بۇل تۋرالى وڭتۇستىك امەريكا ەلىنىڭ پرەزيدەنتى لۋيس يناسيۋ لۋلا دا سيلۆا مالىمدەدى، دەپ جازادى ت ا س س.
ونىڭ ايتۋىنشا، ەگەر اتالعان كۇنگە دەيىن ا ق ش بيلىگى برازيليا ونىمدەرىنە جاريالاعان 50 پايىزدىق باج سالىعىن جويماسا، ەل «ءوزارا جاۋاپ بەرۋ» قاعيداتىنا كوشەدى.
- ەگەر [ا ق ش تاراپىنان باج سالىعىن جويۋ تۋرالى] شەشىم قابىلدانباسا، ءبىز 1- تامىزدان باستاپ ءوزارا شارالار قاعيداتىن قولدانامىز، - دەدى مەملەكەت باسشىسى Jornal Nacional باسىلىمىنا بەرگەن سۇحباتىندا.
لۋلا دا سيلۆا ا ق ش- تىڭ مۇنداي تاريفتىك ساياساتى BRICS ەلدەرىن ءوزارا ساۋدادا ا ق ش دوللارىنان تەزىرەك باس تارتۋعا يتەرمەلەۋى مۇمكىن ەكەنىن اتاپ ءوتتى.
سونداي-اق پرەزيدەنت بۇعان دەيىن ا ق ش پرەزيدەنتى دونالد ترامپتان كەلگەن حاتتىڭ مازمۇنىن «قابىلداۋعا كەلمەيدى» دەپ باعالادى. حاتتا ترامپ برازيليا باسشىلىعىن بۇرىنعى پرەزيدەنت جاير بولسونارۋعا قاتىستى سوت پروتسەسىنە بايلانىستى سىنعا العان.
- بۇل - ءبىر ەلدىڭ ەكىنشى ءبىر ەگەمەن مەملەكەتتىڭ ىشكى ىسىنە ارالاسۋى. مۇنداي ارەكەت - ەشقانداي جاعدايدا قابىلدانبايدى، - دەدى لۋلا دا سيلۆا.
ەسكە سالا كەتسەك، دونالد ترامپ 1-تامىزدان باستاپ برازيليادان اكەلىنەتىن تاۋارلارعا 50 پايىز كولەمىندە باج سالىعىن ەنگىزەتىنىن مالىمدەگەن. اق ءۇي باسشىسىنىڭ ايتۋىنشا، بۇل شەشىم ا ق ش پەن برازيليا اراسىنداعى ساۋدا تەڭگەرىمىنىڭ بۇزىلۋىنا بايلانىستى قابىلدانعان.
برازيليا پرەزيدەنتى بۇل مالىمدەمەلەردى «ابسۋرد» دەپ باعالادى. ول سونداي- اق ا ق ش تاراپىنان ەنگىزىلگەن تاريفتەرگە ەل بيلىگى 11 -ساۋىردە قابىلدانعان ءوزارا ەكونوميكالىق شارالار تۋرالى زاڭ اياسىندا جاۋاپ بەرەتىنىن ايتتى. بۇل زاڭ ساۋدا جەڭىلدىكتەرىن، ينۆەستيتسيالاردى جانە زياتكەرلىك مەنشىك قۇقىقتارىنا قاتىستى مىندەتتەمەلەردى توقتاتۋ كريتەرييلەرىن قامتيدى.
