ساۋد ارابياسى سيريانىڭ دۇنيەجۇزىلىك بانككە قارىزىن وتەۋگە نيەتتى
استانا. KAZINFORM - ەر-رياد 15 ميلليون دوللار تولەيدى، بۇل داماسككە قارجىلىق كومەك الۋعا مۇمكىندىك بەرەدى، دەپ حابارلايدى Kazinform مەنشىكتى ءتىلشىسى.
ساۋد ارابياسى حالىقارالىق قارجىلىق كومەككە، اتاپ ايتقاندا، ينفراقۇرىلىمدى قالپىنا كەلتىرۋگە جانە داعدارىستى باستان كەشىرىپ وتىرعان ەلدىڭ مەملەكەتتىك سەكتورىنا قولداۋ كورسەتۋگە ارنالعان ميلليونداعان دوللارلىق گرانتتارعا قولجەتىمدىلىكتى اشۋ ءۇشىن سيريانىڭ دۇنيەجۇزىلىك بانك الدىنداعى قارىزىن وتەۋدى كوزدەپ وتىر. بۇل تۋرالى ءۇش اقپارات كوزىنە سىلتەمە جاساپ Reuters حابارلادى.
ماسەلە شامامەن 15 ميلليون دوللار بولىپ وتىر - بۇل دۇنيەجۇزىلىك بانك تاراپىنان كومەك كورسەتۋ باعدارلامالارىن قالپىنا كەلتىرۋ ءۇشىن قاجەت سوما.
ەگەر ەر-ريادتىڭ جوسپارى جۇزەگە اساتىن بولسا، بۇل 2024 -جىلى بۇرىنعى پرەزيدەنت باشار اساد بيلىكتەن قۋىلعاننان كەيىن ساۋد ارابياسىنىڭ سيرياعا قارجىلاي قولداۋ كورسەتۋىنىڭ بەلگىلى العاشقى وقيعاسى بولماق.
اگەنتتىك دەرەككوزدەرى سونداي-اق بۇل پارسى شىعاناعى ەلدەرىنىڭ سيريانىڭ جاڭا بيلىگىن قولداۋ ۇدەرىسىنە بىرتىندەپ قوسىلۋىن تانىتۋى مۇمكىن ەكەنىن كورسەتەدى. بۇعان دەيىن كاتاردىڭ سيريالىق مەملەكەتتىك قىزمەتكەرلەردىڭ جالاقىسىن قارجىلاندىرۋعا قاتىستى وسىنداي باستاماسى ا ق ش- تىڭ سانكتسيالىق ساياساتىنا قاتىستى بەلگىسىزدىككە بايلانىستى كەيىنگە قالدىرىلعان بولاتىن.
ولاي بولعانىمەن، ناۋرىز ايىندا دوحا ەنەرگيامەن قامتاماسىز ەتۋدى ءىشىنارا تۇراقتاندىرۋ ماقساتىندا سيرياعا يوردانيا اۋماعى ارقىلى گاز جەتكىزۋ جوسپارىن جاريالادى. Reuters مالىمەتىنشە، ۆاشينگتون بۇل باستاماعا بەيرەسمي كەلىسىم بەرگەن.
وسى ارادا سيريالىق SANA اقپارات اگەنتتىگىنىڭ حابارلاۋىنشا، سيريانىڭ قارجى ءمينيسترى مۇحاممەد ياسەر بارنيا دۇيسەنبىدە دۇنيەجۇزىلىك بانكتىڭ تەحنيكالىق دەلەگاتسياسىمەن كەلىسسوز جۇرگىزدى. بۇل - سيريانىڭ جاڭا اكىمشىلىگى وكىلدەرىنىڭ حالىقارالىق قارجى ۇيىمىمەن العاشقى اشىق كەزدەسۋى.
تاراپتار قارجىلىق-ەكونوميكالىق ىنتىماقتاستىقتى نىعايتۋ پەرسپەكتيۆالارىن، سونىڭ ىشىندە بۇزىلعان ەنەرگەتيكالىق ينفراقۇرىلىمدى قالپىنا كەلتىرۋ جانە مەملەكەتتىك سەكتورداعى ەڭبەكاقى قورىن قولداۋ مۇمكىندىكتەرىن تالقىلادى. سيريا قارجى مينيسترلىگىنىڭ باسشىسى حالىقارالىق سانكسيالار مەن بۇرىنعى ەكونوميكالىق ساياساتتىڭ ەلدىڭ بانك جۇيەسىنە تيگىزگەن كەرى اسەرىن دە باسا ايتتى.
حابارلانعانداي، سيريا دەلەگاتسياسى داماسكىدە بيلىك اۋىسقان ساتتەن باستاپ العاش رەت دۇنيەجۇزىلىك بانك پەن حۆق كوكتەمگى سەسسيالارىنا قاتىسۋ ءۇشىن ۆاشينگتونعا بارۋعا دايىندالىپ جاتىر. دەلەگاتسيانىڭ امەريكالىق شەنەۋنىكتەرمەن كەزدەسۋ وتكىزبەيتىنى كۇتىلىپ وتىر، الايدا ونىڭ قاتىسۋىنىڭ ءوزى ماڭىزدى وقيعا رەتىندە قاراستىرىلادى.
ءىشىنارا گۋمانيتارلىق كومەك كورسەتىلسە دە، اساد بيلىگى كەزىندە سيرياعا سالىنعان سانكتسيالاردىڭ كوپشىلىگى كۇشىندە قالدى. وتكەن ايدا ا ق ش پرەزيدەنتى دونالد ترامپتىڭ اكىمشىلىگى سيريالىق تاراپقا شارتتاردىڭ تىزبەسىن تاپسىردى، ولاردىڭ ورىندالۋى شەكتەۋلەردى ءىشىنارا جەڭىلدەتۋگە اكەلۋى مۇمكىن.
ەسكە سالا كەتسەك، ب ا ءا مەن سيريا پرەزيدەنتتەرى ەكىجاقتى بايلانىستى نىعايتۋ ماسەلەسىن تالقىلادى.
بۇعان دەيىن قازاقستاندىق بىتىمگەرلەر سيريادان ەلگە ورالعانىن جازعان بولاتىنبىز.
