ساۋد ارابياسى نەتانياحۋدىڭ پالەستينالىقتاردى كوشىرۋ تۋرالى ۇسىنىسىن ايىپتادى

- ساۋد ارابياسى پرەمەر-مينيستر بينيامين نەتانياحۋدىڭ پالەستينالىقتاردى گازادان شىعارۋ تۋرالى مالىمدەمەلەرىنەن ءۇزىلدى-كەسىلدى باس تارتاتىنىن قايتالايدى، - دەلىنگەن سىرتقى ىستەر مينيسترلىگىنىڭ مالىمدەمەسىندە.

ورىنسىز ءازىل

بۇل مالىمدەمە نەتانياحۋ بۇرىن يزرايل تەلەارناسىندا پالەستينالىقتاردىڭ ساۋد ارابياسىندا مەملەكەت قۇرا الادى دەپ ازىلدەگەنىنەن كەيىن جاسالدى، دەپ حابارلايدى The Times of Israel.

بەيسەنبى كۇنى 14- ارناداعى اڭگىمەلەسۋ بارىسىندا جۇرگىزۋشى يااكوۆ باردۋگو ساۋد ارابياسىنىڭ يزرايلمەن قارىم-قاتىناستى قالىپقا كەلتىرۋدىڭ العىشارتتارى تۋرالى ايتقان كەزدە قاتەلەسىپ، «پالەستينا مەملەكەتىن» «ساۋد مەملەكەتى» دەپ اتادى.

نەتانياحۋ ونى تۇزەتۋگە اسىعىس بولدى، ءبىراق «ساۋديالىقتار ساۋد ارابياسىندا پالەستينا مەملەكەتىن قۇرا الادى» دەپ ازىلدەپ جاۋاپ بەرىپ، «ولاردىڭ جەرى كوپ» ەكەنىن اتاپ ءوتتى. جۇرگىزۋشى بۇل قىزىق يدەيا، ونى جوققا شىعارۋعا بولمايدى دەپ جاۋاپ بەرگەندە، نەتانياحۋ ءوز ءسوزىن قايتالاپ، ساۋد ارابياسىنىڭ «تەرريتورياسىنىڭ اۋقىمدى» ەكەنىن ايتتى.

ەسكە سالا كەتسەك، ساۋد ارابياسى گازا سەكتورىنان پالەستينالىقتاردى ىعىستىرۋعا باعىتتالعان كەز كەلگەن ارەكەتتەن باس تارتاتىنىن اتاپ ءوتىپ، پالەستينا مەملەكەتى قۇرىلماي يزرايلمەن قاتىناس ورناتپايتىنىن اشىق ءبىلدىردى.

اراب الەمى ايىپتاپ وتىر

نەتانياحۋدىڭ سوزدەرى اراب مەملەكەتتەرىنىڭ نارازىلىعىن تۋدىردى.

ساۋد ارابياسىنىڭ سىرتقى ىستەر مينيسترلىگى جەكسەنبى كۇنى پالەستينالىقتاردى گازادان شىعارۋ تۋرالى كەز كەلگەن مالىمدەمەنى ءۇزىلدى-كەسىلدى قابىلدامايتىنىن مالىمدەدى. سونىمەن بىرگە، ساۋد ارابياسىنىڭ مالىمدەمەسىندە پرەمەر-ءمينيستردىڭ ساۋد ارابياسى اۋماعىندا پالەستينا مەملەكەتىن قۇرۋ تۋرالى تۇسىنىكتەمەلەرىنە تىكەلەي سىلتەمە جوق.

- يزرايلدىڭ ەكسترەميستىك، وككۋپاتسيالىق مەنتاليتەتى پالەستينا جەرىنىڭ باۋىرلاس پالەستينا حالقى ءۇشىن نەنى بىلدىرەتىنىن جانە ونىڭ وسى جەرمەن ەموتسيونالدى، تاريحي جانە قۇقىقتىق بايلانىسىن تۇسىنۋگە كەدەرگى جاسايدى، - دەلىنگەن مالىمدەمەدە.

اراب مەملەكەتتەرى ليگاسى (ا م ل) دا يزرايل پرەمەر-ءمينيسترىنىڭ سوزدەرىن سىنعا الىپ، بۇل سوزدەردىڭ شىندىقتان مۇلدەم الشاق جاتقانىن مالىمدەدى.

ول جاقىندا ب ا ق- قا بەرگەن سۇحباتىندا نەتانياحۋ ايتقان يدەيالار «قيال نەمەسە يلليۋزيادان باسقا ەشتەڭە ەمەس» دەپ اتاپ ءوتتى.

كاتار مەملەكەتى دە پرەمەر-مينيستر بينيامين نەتانياحۋنىڭ مالىمدەمەسىن ايىپتاپ، ونى «ارانداتۋشىلىق» دەپ سيپاتتادى.

يوردانيا س ءى م ساۋد ارابياسى اۋماعىندا پالستينا مەملەكەتىن قۇرۋ تۋرالى مالىمدەمەسىن ايىپتاپ، بۇنى حالىقارالىق قۇقىقتى ورەسكەل بۇزاتىن ارانداتۋ ارەكەتى دەدى.

ۆەدومستۆو وكىلى سۋفيان كۋدا يزرايل ۇكىمەتى ارانداتۋشىلىق ساياساتىن جالعاستىرىپ، مەملەكەتتىڭ ەگەمەندىگى مەن حالىقارالىق قۇقىققا نۇقسان كەلتىرەتىن مالىمدەمەلەر جاساپ جاتقانىن باسا ايتتى.

گازاداعى پالەستينالىقتاردىڭ تاعدىرى تۋرالى پىكىرتالاستار پرەزيدەنت دونالد ترامپتىڭ وتكەن اپتادا ا ق ش يزرايلدەن «گازانى تارتىپ الادى» جانە پالەستينالىقتاردى باسقا جەرگە قونىستاندىرۋ ارقىلى «تاياۋ شىعىستىڭ ريۆەراسىن» جاسايدى دەگەن تاڭقالارلىق ۇسىنىسىنىڭ كولەڭكەسىندە قالدى.

اراب مەملەكەتتەرى ترامپتىڭ گازاداعى سوعىستا اتىستى توقتاتۋ كەزىندە ايتقان سوزدەرىن قاتاڭ ايىپتادى.

ترامپ سونىمەن قاتار ساۋد ارابياسى يزرايلمەن قارىم-قاتىناستى قالىپقا كەلتىرۋدىڭ شارتى رەتىندە پالەستينا مەملەكەتىن قۇرۋدى تالاپ ەتپەيتىنىن مالىمدەدى. ءبىراق ەر-رياد ونىڭ مالىمدەمەسىن قابىلداماي، ءوزىنىڭ ۇستانىمىن «ا ق ش- تىڭ بۇرىنعى اكىمشىلىگى مەن قازىرگى اكىمشىلىگىنە جەتكىزگەنىن» باسا ايتتى. وندا پالەستينا مەملەكەتىن قۇرمايىنشا يزرايلمەن قارىم- قاتىناستىڭ قالىپقا كەلمەيتىنى ايتىلعان.

وسىعان دەيىن مىسىر مەن يوردانيا پالەستينالىقتاردى قونىستاندىرۋعا قارسى ەكەنى تۋرالى جازدىق.

اۆتور

زارينا تۋعانبايەۆا

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى