ساۋد ارابياسى ب ۇ ۇ قاۋىپسىزدىك كەڭەسىن شۇعىل جينالىسقا شاقىردى
استانا. KAZINFORM - ساۋد ارابياسى گازا سەكتورىنداعى گۋمانيتارلىق اپاتتىڭ الدىن الۋ ءۇشىن ب ۇ ۇ قاۋىپسىزدىك كەڭەسىن شۇعىل وتىرىس وتكىزۋگە شاقىردى، دەپ حابارلايدى انادولى اگەنتتىگى.
«قورشاۋداعى گازا سەكتورىنىڭ وڭتۇستىگىندە ورنالاسقان رافاح قالاسىنا جاسالعان شابۋىلداردىڭ سالدارى وتە قاۋىپتى بولادى»، - دەلىنگەن كورولدىك سىرتقى ىستەر مينيسترلىگى انكلاۆتىڭ وسى بولىگىندە يزرايلدىڭ جەردەگى ىقتيمال وپەراتسياسىنا بايلانىستى مالىمدەمەسىندە.
رافاح - يزرايلدىڭ جاۋىزدىق اگرەسسياسىنان قاشۋعا ءماجبۇر بولعان جۇزدەگەن مىڭ بەيبىت تۇرعىنداردىڭ سوڭعى باسپاناسى.
«ءبىز وندا پانا ىزدەگەن ادامداردى ماجبۇرلەپ ەۆاكۋاتسيالاۋدى قابىلدامايمىز جانە قاتاڭ ايىپتايمىز»، - دەلىنگەن حابارلامادا.
ساۋد ارابياسى تەز ارادا اتىستى توقتاتۋعا شاقىرىپ، يزرايل سەبەپ بولۋى مۇمكىن جاڭا گۋمانيتارلىق اپاتتىڭ الدىن الۋ ءۇشىن ب ۇ ۇ قاۋىپسىزدىك كەڭەسىنىڭ شۇعىل وتىرىسىن وتكىزۋ قاجەتتىگىن مالىمدەدى.
يزرايل پرەمەر-ءمينيسترى بينيامين نەتانياحۋ اقپاننىڭ 4-كۇنى مالىمدەمە جاساپ، يزرايلدىڭ مىسىرمەن شەكارادا ورنالاسقان جانە جۇزدەگەن مىڭ پالەستينالىق يزرايل شابۋىلدارىنان پانالاعان رافاح قالاسىنا قۇرلىق وپەراتسياسىن باستاۋدى جوسپارلاپ وتىرعانىن اشىق ايتتى.
اۆتور
ەركەجان سماعۇلوۆا
