سۋ تاسقىنىنان زارداپ شەككەن قازاقستاندىقتار نەسيە بويىنشا بورىشىن كەيىن تولەي الادى

قازاقستان قارجىگەرلەر قاۋىمداستىعىنىڭ حابارلاۋىنشا، بانكتەر سۋ تاسقىنىنان زارداپ شەككەندەر ساناتىنا جاتقىزىلعان جەكە جانە زاڭدى تۇلعالارعا نەسيە بويىنشا بورىشتارىن وتەۋ مەرزىمىن 2024-جىلدىڭ 1-ساۋىرىنەن 30-ماۋسىمىنا دەيىن كەيىنگە قالدىرۋعا دايىن ەكەنىن راستادى.

ءتيىستى تىزىمدەردى اكىمدىكتەر شىعارادى. بۇل تىزىمدەرگە كىرگەن ازاماتتارعا تولەمدى كەشىكتىرگەنى ءۇشىن ايىپپۇل مەن ءوسىمپۇل سالىنبايدى.

جاقىن ارادا بانكتەر ءوز سايتتارىندا جانە الەۋمەتتىك جەلىلەردە كەيىنگە قالدىرىلعان بورىشتى وتەۋ بويىنشا مەرزىمدى ۇزارتۋدى ۇسىنۋدىڭ ناقتى مەحانيزمدەرىن، سونداي-اق وتىنىمدەردى بەرۋ الگوريتمىن جانە ودان كەيىنگى ارەكەتتەردى جاريالايدى.

بۇگىن سۋ تاسقىنىنا قارسى شارالاردى ۇيلەستىرۋ جانە قارعىن سۋ ءجۇرۋ كەزەڭىنىڭ سالدارىن جويۋ جونىندەگى رەسپۋبليكالىق شتابتىڭ وتىرىسىندا مەملەكەت باسشىسى قاسىم-جومارت توقايەۆ سۋ تاسقىنىنان زارداپ شەككەندەرگە كومەك كورسەتۋ ءۇشىن ۇكىمەتتىڭ، اكىمدىكتەردىڭ جانە «قازاقستان حالقىنا» قورىنىڭ قارجىسىن پايدالانۋدى تاپسىردى.

سونداي-اق پرەزيدەنت وتاندىق بيزنەستەن شەتتە قالماي، ازاماتتارعا كومەكتەسۋگە شاقىردى.

بۇعان دەيىن استانادان وڭىرلەرگە 30 توننادان استام گۋمانيتارلىق كومەك جىبەرىلگەنى تۋرالى حابارلاعان بولاتىنبىز.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى