سۋ تاسقىنى: پەتروپاۆلعا اۋىز سۋ پويىزبەن جەتكىزىلدى
استانا. KAZINFORM - سۋ تاسقىنىنا ۇشىراعان پەتروپاۆل قالاسىنىڭ تۇرعىندارىن تازا اۋىز سۋمەن قامتۋ تۋرالى ساۋدا جانە ينتەگراتسيا مينيسترلىگى ساۋدا كوميتەتى ءتوراعاسىنىڭ ورىنباسارى ەرنۇر جاۋتىكبايەۆ ايتىپ بەردى.
«بۇگىندە سۋ تاسقىنىنان زارداپ شەككەن وڭىرلەردە باعا جاعدايى تۇراقتى، ازىق-تۇلىك جەتكىزۋدە كەدەرگى جوق. الەۋمەتتىك ماڭىزى بار ازىق-تۇلىك باعاسىنىڭ ءوسۋى بايقالمايدى. سۋ باسقان وڭىرلەردە كۇن سايىن ساۋدا وبەكتىلەرىنە مونيتورينگ جۇرگىزىلەدى. ايتار بولساق، پەتروپاۆل قالاسىنا قالاعا سۋ بەرۋدىڭ بۇزىلۋىنا بايلانىستى كۇن سايىن «ماگنۋم» ساۋدا جەلىسى جانە ديستريبيۋتورلىق كومپانيالارمەن قالا حالقىن اۋىز سۋمەن قامتاماسىز ەتۋ ۇيىمداستىرىلدى»، - دەدى ەرنۇر جاۋتىكبايەۆ ورتالىق كوممۋنيكاتسيالار قىزمەتى الاڭىندا وتكەن باسپا ءسوز ءماسليحاتىندا.
سونداي-اق، پەتروپاۆلعا جەتەتىن اۆتوجولداردى سۋ باسىپ، قوزعالىستىڭ شەكتەلۋىنە بايلانىستى ساۋدا مينيسترلىگى «قازاقستان تەمىر جولى» ۇلتتىق كومپانياسى باسشىلىعىمەن بىرلەسىپ اۋىز سۋدى پويىزبەن جەتكىزگەن.
«كوكشەتاۋ مينەرالدى سۋلارى» ا ق- مەن 5 ليترلىك بوتەلكەگە (تاۋلىك بويى) سۋ قۇيۋعا جانە جەدەل جەتكىزۋ جونىندە ۋاعدالاستىققا قول جەتكىزىلدى. سولتۇستىك قازاقستان وبلىسىنىڭ ساۋدا دەپارتامەنتىنىڭ مالىمەتىنشە، سۋ جەتكىزۋدە پروبلەما جوق، بارلىق قاتىناس باعىتى اشىق جانە كەدەرگىسىز جۇرگىزىلۋدە»، - دەيدى ول.
