سۋ تاسقىنى جاعدايىندا سەناتورلاردىڭ نەگىزگى مىندەتتەرى بەلگىلەندى
استانا. KAZINFORM - سەنات ءتوراعاسى ماۋلەن اشىمبايەۆ پالاتا بيۋروسىنىڭ وتىرىسىن وتكىزىپ، سۋ تاسقىنىنىڭ سالدارىنان وڭىرلەردە قالىپتاسقان جاعدايعا بايلانىستى سەناتورلاردىڭ الدىندا تۇرعان نەگىزگى مىندەتتەردى بەلگىلەپ بەردى.
سونداي- اق، ءىس- شارا بارىسىندا دەپۋتاتتار 3-ءساۋىر كۇنى وتەتىن سەنات وتىرىسىنىڭ كۇن ءتارتىبىن بەكىتتى.
ماۋلەن اشىمبايەۆ ءوز سوزىندە جاعدايدىڭ كۇردەلى ەكەنىنە نازار اۋدارىپ، ارىپتەستەرىن پروبلەمانى شەشۋگە ىقپال ەتۋ جانە الداعى ۋاقىتتا مۇنداي وقيعانىڭ قايتالانۋىنا جول بەرمەۋ ءۇشىن كۇش جۇمىلدىرۋعا شاقىردى. سونداي-اق ول بۇل ماسەلە مەملەكەت باسشىسىنىڭ ەرەكشە باقىلاۋىندا ەكەنىن ايتتى.
«ەلىمىزدىڭ ءبىرقاتار وڭىرىندە كۇردەلى جاعداي قالىپتاسىپ وتىر. قارعىن سۋ ەلدى مەكەندەردى باسىپ، جولدار مەن كوپىرلەردى شايىپ كەتىپ جاتىر. وسىعان بايلانىستى مەملەكەت باسشىسى ۇكىمەت پەن جەرگىلىكتى اتقارۋشى ورگاندارعا توتەنشە جاعدايعا قارسى تۇرۋ جانە ونىڭ زارداپتارىن جويۋ جونىندە ناقتى تاپسىرمالار بەردى. پرەزيدەنتىمىز باستى مىندەت ادام شىعىنىنا جول بەرمەۋ ەكەنىن باسا ايتتى. مۇنداي قيىن جاعدايدا مەملەكەت ازاماتتاردى جالعىز قالدىرماي، قولداۋ كورسەتەتىنى انىق. بارلىق زارداپ شەككەندەرگە جان- جاقتى كومەك كورسەتىلەدى»، - دەدى سەنات ءتوراعاسى.
سونىمەن قاتار پالاتا سپيكەرى وڭىردەگى تۇرعىندارعا قولداۋ كورسەتۋ ءۇشىن سەنات پەن ءماسليحاتتاردىڭ ۇيلەسىمدى جۇمىس ىستەۋى ماڭىزدى ەكەنىن اتاپ ءوتتى.
«قازىردىڭ وزىندە ءبىرقاتار سەناتورلار وڭىرلەرگە بارىپ، جەرگىلىكتى جەرلەردە اتقارۋشى ورگاندارعا قولعابىس كورسەتىپ جاتىر. الداعى ۋاقىتتا ءبىز وسى باعىتتاعى كەشەندى جۇمىستى كۇشەيتىپ، ءماسليحات دەپۋتاتتارىمەن بىرگە جەرگىلىكتى جەرلەردەگى پروبلەمالاردى شەشۋدىڭ ءتيىمدى جولدارىن ىزدەۋىمىز كەرەك»، - دەدى ماۋلەن اشىمبايەۆ.
پالاتا وتىرىسىنىڭ بەكىتىلگەن كۇن تارتىبىنە سايكەس سەناتورلار الداعى سارسەنبىدە «ەۋرازيالىق ەكونوميكالىق وداققا مۇشە مەملەكەتتەردە عىلىمي دارەجەلەر تۋرالى قۇجاتتاردى ءوزارا تانۋ تۋرالى كەلىسىمدى راتيفيكاتسيالاۋ تۋرالى» زاڭدى قارايدى. بۇل قۇجات ە ا ە و- عا مۇشە مەملەكەتتەر ازاماتتارىنىڭ عىلىمي دارەجەلەرىن ەڭبەك كوشى- قونى شەڭبەرىندە بەس ەلدىڭ اۋماعىندا تانۋدى كوزدەيدى.
وسىلايشا، ە ا ە و ەلدەرىنىڭ اۋماعىندا جۇمىسقا ورنالاسقان جاعدايدا فيلوسوفيا دوكتورى (PhD)، بەيىندى دوكتور، عىلىم كانديداتى جانە عىلىم دوكتورى سياقتى عىلىمي دارەجەلەر راستاۋسىز تانىلادى.
ودان بولەك، پالاتا وتىرىسىندا «قازاقستان رەسپۋبليكاسىنىڭ ۇكىمەتى مەن قىرعىز رەسپۋبليكاسىنىڭ مينيسترلەر كابينەتى اراسىنداعى اۆياتسيالىق ىزدەستىرۋ جانە قۇتقارۋ سالاسىنداعى ىنتىماقتاستىق تۋرالى كەلىسىمدى راتيفيكاتسيالاۋ تۋرالى» زاڭ قارالادى.
زاڭ حالىقارالىق ازاماتتىق اۆياتسيا ۇيىمىنىڭ ستاندارتتارى مەن ۇسىنىلعان تاجىريبەسىنە سايكەس اپاتقا ۇشىراعان اۋە كەمەلەرىنىڭ جولاۋشىلارى مەن ەكيپاجدارىن ىزدەۋ جانە قۇتقارۋ ءۇشىن مەملەكەتتەر اراسىندا ىنتىماقتاستىق ورناتۋدى ماقسات تۇتادى.
سونداي-اق بيۋرو وتىرىسىندا ماجىلىستەن كەلىپ تۇسكەن زاڭدار سەناتتىڭ تۇراقتى كوميتەتتەرىنە ءبولىنىپ بەرىلدى.
اۆتور
ەربول جانات
