سۋ تاسقىنى: ءبىلىم بەرۋ مەكەمەلەرىن قالپىنا كەلتىرۋگە 7 ميلليارد تەڭگە ءبولىندى
استانا. KAZINFORM - ۇكىمەت كوكتەمگى سۋ تاسقىنىنان زارداپ شەككەن ءبىلىم بەرۋ مەكەمەلەرى مەن ۇيىمدارىن قالپىنا كەلتىرۋ جۇمىستارىن جالعاستىرۋدا. وسى ماقساتتا ۇكىمەتتىڭ توتەنشە رەزەرۆىنەن قوسىمشا قاراجات ءبولىندى. ءتيىستى قاۋلىعا پرەمەر-مينيستر ولجاس بەكتەنوۆ قول قويدى.
قالپىنا كەلتىرۋ جۇمىسى ەلىمىزدىڭ ءۇش ءوڭىرىن - قوستاناي، اقمولا جانە اقتوبە وبلىستارىن قامتيدى. بولىنگەن قاراجاتتىڭ جالپى سوماسى - 7,5 ميلليارد تەڭگە. بۇل قاراجات بۇلىنگەن نىسانداردى قالپىنا كەلتىرۋگە، سونداي-اق قيراعان نىسانداردىڭ ورنىنا جاڭا ءبىلىم بەرۋ مەكەمەلەرىن سالۋعا جۇمسالادى.
قوستاناي وبلىسىندا جانگەلدين اۋدانىنداعى ايسا نۇرمانوۆ اتىنداعى مەكتەپ عيماراتىن جوندەۋ جوسپارلانعان. اقمولا وبلىسىندا اتباسار قالاسىندا №1-مەكتەپ، اتباسار اۋدانى سەرگەيەۆكا اۋىلىندا «ەسىل» ساۋىقتىرۋ كەشەنى، سونداي-اق دەرجاۆينسك قالاسىندا اباي اتىنداعى مەكتەپ سالىنادى. اقتوبە وبلىسىندا كوتىبار باتىر اتىنداعى مەكتەپ جانە مۇعالجار اۋدانىنداعى «بالاۋسا» بالاباقشاسى، ويىل اۋدانىنداعى «بالبوبەك» مەكتەپ-باقشاسى مەن بالاباقشاسى، ەكپەتال مەكتەبى قامتىلادى.
بولىنگەن قاراجات جەرگىلىكتى اتقارۋشى ورگاندارعا بۇلىنگەن عيماراتتاردى الداعى وقۋ جىلى باستالعانعا دەيىن ۋاقىتىلى قالپىنا كەلتىرۋگە مۇمكىندىك بەرەدى. بۇل - ءبىلىم بەرۋ پروتسەسىنىڭ ۇزدىكسىز جۇرگىزىلۋىن قامتاماسىز ەتەدى.
بيىلعى 17-شىلدەدە ۇكىمەتتە سۋ تاسقىنىنان كەيىن تۇرعىن ۇيلەر مەن ينفراقۇرىلىمدى قالپىنا كەلتىرۋ ماسەلەلەرى جونىندە وتكەن كەڭەس بارىسىندا پرەمەر-مينيستر ولجاس بەكتەنوۆ قالپىنا كەلتىرۋ جۇمىستارىنىڭ قارقىنىن جەدەلدەتۋدى جانە ورتالىقتى تۋىنداپ جاتقان ماسەلەلەر تۋرالى ۇنەمى حاباردار ەتىپ وتىرۋدى تاپسىردى.
اۆتور
ەربول جانات
