سۋ تاسقىنان دايىندالماعاندا قانشاما ادامىمىزدى جوعالتىپ الار ەدىك - ت ج م
استانا. KAZINFORM - قازىرگى ۋاقىتتا دا سۋ تاسقىنىنا دايىندىق جۇرگىزىلىپ جاتىر. بۇل تۋرالى توتەنشە جاعدايلار ۆيتسە- ءمينيسترى باۋىرجان سىزدىقوۆ ايتتى.
«قازىردىڭ وزىندە سۋ تاسقىنىنا ناعىز دايىندىق ۇستىندەمىز. ەگەر ءبىز دايىن بولماعان كۇندە، قۇداي ساقتاسىن، شەتەلدەگىدەي سۋ تاسقىنىنان قانشاما ادامىمىزدى جوعالتىپ الار ەدىك. ال بۇگىنگى تاڭدا شۇكىر دەپ ايتۋ كەرەك، بىردە- ءبىر ادام شىعىنى جوق. دەمەك، كۇشتەر مەن قۇرالداردىڭ دايىندىعى بولدى»، - دەدى ۆيتسە- مينيستر ۇكىمەت وتىرىسىنان كەيىنگى بريفينگتە.
سونىمەن قاتار ول ارقالىق قالاسىندا تۇرعىنداردى ەۆاكۋاتسيالاۋعا بارعان تىكۇشاقتىڭ جانار-جاعارماي بولماعاندىقتان قاڭتارىلىپ تۇرعانى تۋرالى اقپاراتتىڭ جالعان ەكەندىگىن ايتتى.
«توتەنشە جاعدايلار مينيسترلىگىندە، اۋەجايلاردا تىكۇشاقتارعا جانار-جاعارماي قۇياتىن اۆتوكولىكتەر بار. ولاردا جەتكىزۋ ماسەلەسى بولدى. سەبەبى، كەيبىر جولدارمەن ءجۇرۋ قيىندىققا سوقتى»، - دەدى باۋىرجان سىزدىقوۆ.
اۆتور
مارلان جيەمباي
