س ق و-دا قوي ۇرلادى دەگەن كۇدىكپەن جەتى جىگىت ۇستالدى
سولتۇستىك قازاقستان وبلىسىندا جەتى جىگىت جاز بويى جۇرتتىڭ قوراسىنا ءتۇسىپ، قوي ۇرلاپ كەلگەن.
31 قويدى قولدى ەتكەن كۇدىكتىلەر قولعا ءتۇستى، دەپ حابارلايدى قازاقپارات ءتىلشىسى.
س ق و پوليتسيا دەپارتامەنتى باسپا ءسوز قىزمەتىنىڭ مالىمەتىنشە، قولعا تۇسكەن كۇدىكتىلەردىڭ جاسى 18 بەن 22 ارالىعىندا. ۇرلىقتى كاسىپ ەتكەن جىگىتتەردى ەسىل اۋدانى پوليتسيا ءبولىمىنىڭ قىزمەتكەرلەرى ۇستاپ، قازىر تەرگەۋ جۇرگىزىپ جاتىر.
بۇگىنگى كۇنى ىستە 10 ەپيزود بار. قىلمىستار بيىل جازدا ەسىل اۋدانىندا، تاعى ەكى فاكتى مامليۋت جانە شال اقىن اۋداندارىندا جاسالعان.
قىلمىسكەرلەر اۋىل تۇرعىندارىنىڭ قورا-قوپسىنا كىرىپ، قوي ۇرلاعان. ءبىر ۇرلاعاندا 6 قويدى الىپ كەتىپ وتىرعان.
تامىز ايىندا جەدەل ىزدەستىرۋ شارالارىنىڭ ناتيجەسىندە پوليتسەيلەر وبلىستىڭ كۇدىكتى جەتى تۇرعىنىن ۇستادى.
تەرگەۋ بارىسىندا ولاردىڭ ۇرلانعان مالداردىڭ ەتىن پەتروپاۆلدا ساتقانى انىقتالدى. ساتىپ الۋشىدان ءتورت قوي تاركىلەندى.
مالى ۇرلانعان تۇرعىندار پوليتسياعا ارىزدانباعان. ولار قويلارى قورادان وزدەرى شىعىپ جوعالىپ كەتكەن بولۋى مۇمكىن دەپ ويلاعان.
ءبىرقاتار فاكتى تەك تەرگەۋ بارىسىندا عانا انىقتالدى.
سوڭعىسى 19-قىركۇيەك كۇنى تىركەلدى. بارلىعى 31 قويدىڭ ۇرلانعانى بەلگىلى بولدى.
كۇدىكتىلەر قاماۋعا الىندى. ق ر قىلمىستىق كودەكسىنىڭ 188-1-بابىنىڭ 3-بولىگى «مال ۇرلاۋ» بويىنشا تەرگەۋ ءجۇرىپ جاتىر.
