سۋ باسقان وڭىرلەرگە ءبىرىنشى كەزەكتە نە قاجەت
استانا. KAZINFORM - قازىر ەلوردا اۋماعىنداعى ءبىرقاتار نىساندا سۋ تاسقىنىنان زارداپ شەككەن وڭىرلەرگە گۋمانيتارلىق كومەك جاساۋ ماقساتىندا ۆولونتەرلەر قىزمەت ەتىپ جاتىر. بىرنەشە كۇننەن بەرى قالا تۇرعىندارى سۋ باسقان ەلدى مەكەندەردىڭ تۇرعىندارىنا قاجەت جۇكتى جيناپ بەرۋگە بەلسەندى اتسالىسىپ جاتقانىن بايقادىق.
وسى ورايدا «استانا جاستارى» رەسۋرستىق ورتالىعى ۇيىمداستىرعان قويماعا بارىپ، ەرىكتىلەردىڭ جۇمىسىمەن تانىستىق.
«قازىر ەلىمىزدىڭ وڭىرلەرىندەگى ەلدى مەكەندەردى سۋ باسىپ، تۇرعىندار قيىن جاعدايعا تاپ بولدى. سوندىقتان اۋىلدارعا گۋمانيتارلىق كومەك قاجەت. كوبىسىنىڭ ءۇيى قيراپ، مال-مۇلكىنەن ايىرىلدى. ولار جاتاقحانالارعا جانە باسقا دا نىساندارعا كوشىرىلدى. ءار قالادا ۆولونتەرلەردىڭ كەڭسەلەرى قۇرىلىپ، ولار كومەككە مۇقتاج ادامدارمەن بايلانىس ورناتىپ جاتىر. ماسەلەن، استانا قالاسىندا الەۋمەتتىك 9 قويما جۇمىس ىستەپ تۇر. ءار قويمامەن تىعىز ءوزارا قارىم-قاتىناس بار، ياعني ءبىر قويمادا جەتكىلىكتى جۇك جينالسا، ءبىز وسى زاتتاردى جەتكىزىپ بەرەتىن جۇك كولىكتەرىن ىزدەيمىز. اتاپ ايتقاندا، قازىر جۇك كولىكتەرى بار ادامدار بىزگە حابارلاسىپ، اقىسىز نەگىزدە گۋمانيتارلىق جۇكتى تاسىمالداپ جاتىر»، - دەدى قالالىق ۆولونتەرلەر شتابى ءتوراعاسىنىڭ ورىنباسارى ەلۆيرا ەسمۇقانوۆا.
ونىڭ ايتۋىنشا، جۇك كولىكتەرى تيەلگەن زاتتار قوستاناي جانە اقتوبە وبلىستارىنداعى شتابتارعا جەتكىزىلىپ جاتىر.
«ءبىز ناقتى ءبىر وڭىردە كىمدەر جۇكتى قابىلداۋعا جانە ونى تۇرعىندارعا تاراتۋعا جاۋاپتى ەكەنىن بىلەمىز. ولار قاي ەلدى مەكەنگە ناقتى قانداي قۇرالدار، ىدىستار، كيىمدەر كەرەك ەكەنىن بىزگە الدىن الا ەسكەرتەدى. ءبىز ءوز كەزەگىمىزدە جەتىسپەي جاتقان كەيبىر زاتتاردى مەتسەناتتاردىڭ كومەگىمەن الىپ جاتىرمىز. 31-ناۋرىزداعى جاعداي بويىنشا ەلورداداعى الەۋەمەتتىك قويمالار ارقىلى 25 توننا جونەلتتىك»، - دەدى ۆولونتەر.
قالا تۇرعىندارى كوبىنە قالىڭ كيىم مەن ازىق-تۇلىكتى قويمالارعا جەتكىزىپ بەرىپ جاتىر.
«ءبىرىنشى كەزەكتە تەز بۇلىنە قويمايتىن ازىق-تۇلىك كەرەك. تەلەفوندار مەن وزگە دە قۇرىلعىلاردى قۋاتتايتىن power bank، جىلىتاتىن قۇرىلعىلار، شاينەك سياقتى زاتتارعا سۇرانىس بار. بىرنەشە كۇننەن بەرى قوستاناي جانە اقمولا وبلىستارىنا جۇكتى جونەلتتىك. الداعى كۇندەرى اقتوبە، باتىس قازاقستان وبلىستارىنا ۇلكەن جۇك كولىكتەرىن جىبەرۋدى جوسپارلاپ وتىرمىز»، - دەدى ەلۆيرا ەسمۇقانوۆا.
قازىر ەلوردا تۇرعىندارى وڭىرلەردەگى جاعدايعا بايلانىستى كومەك قولىن سوزىپ، بەلسەندىلىك تانىتىپ جاتىر. استاناداعى ءار قويماعا كۇنىنە 500 ادام تەلەفون شالىپ، قانداي زاتتاردى جەتكىزىپ بەرەتىنى جايىندا حاباردار ەتەدى.
بۇدان بولەك، قالاداعى ءال-فارابي داڭعىلىنداعى 16-ءۇيدىڭ اۋماعىندا «جاقسىلىق جاسا» ەرىكتىلەر قوزعالىسى دا گۋمانيتارلىق كومەك جۇگىن جيناستىرىپ جاتىر.
وسى ۇيىم وكىلى تاتيانا برىنزانىڭ سوزىنە قاراعاندا، 3 كۇن قاتارىنان «جاقسىلىق جاسا» ەرىكتىلەرى جۇكتى قوستاناي وبلىسىنداعى ەلدى مەكەندەرگە جىبەرۋگە كومەكتەسكەن.
«بۇگىن اقتوبە وبلىسىنا باراتىن جۇك كولىگىنە زاتتاردى تيەپ، جونەلتەمىز. وسى كۇندەرى ازىق- تۇلىك، بالالار كيىمى، كورپە-جاستىق، كەرەۋەت جانە جىلى كيىمدەردى جەتكىزىپ جاتىرمىز. گۋمانيتارلىق جۇكتى وڭىرلەردە بەكىتىلگەن ادامدار قارسى الىپ، تۇرعىندارعا تاراتىپ جاتىر. شالعاي جەرلەرگە تىكۇشاقپەن تاسىمالدانادى. ءدال قازىر سۋ باسقان ەلدى مەكەندەرگە ەلەكتر ەنەرگياسىن بەرەتىن گەنەراتورلار قاجەت بولىپ جاتىر»، - دەدى ول.
ايتا كەتەيىك، 29-ساۋىردەن بەرى ەلورداداعى ن. تىلەنديەۆ كوشەسى بويىندا ورنالاسقان «راحمەت» ساۋدا ورتالىعىنىڭ الاڭىندا قوستاناي وبلىسىنىڭ وڭىرلەرىنە گۋمانيتارلىق جۇك جونەلتۋ بەكەتى ۇيىمداستىرىلعان. وسى كۇندەرى قالا تۇرعىندارى جۇمىستارىنان سۇرانىپ، تاۋلىك بويى زاتتاردى جيناقتاۋعا ارنايى كەلگەن.
«كەشە 10 عا جۋىق كولىككە زاتتاردى تيەدىك. ونىڭ الدىندا ءبىرازىن جونەلتتىك. قازىر قالا تۇرعىندارى كيىم-كەشەك، كورپە، ازىق-تۇلىكتى بىزگە تاپسىرىپ جاتىر. قارجىلاي دا كومەكتەسىپ جاتقاندار بار. اتاپ ايتقاندا، سۋ باسقان اۋىلداردىڭ تۇرعىندارى قولعاپ، كۇرەك، قاپ، رەزەڭكە ەتىك، گەنەراتور سياقتى زاتتاردى جەتكىزىپ بەرۋدى سۇراپ جاتىر. بۇل جۇكتى اقىسىز جەتكىزىپ بەرىپ جاتقان جۇرگىزۋشىلەرگە العىسىمىزدى ايتامىز. بىرنەشە كۇننەن بەرى ساۋدا ورتىلىعىنىڭ الاڭىنا جۇك تاسىمالداۋعا دايىن كولىكتەر كەزەكتەسىپ قاتارعا تۇرىپ جاتىر. قالا تۇرعىندارى قولىنان كەلگەنشە كومەكتەسكەنىن كورىپ وتىرمىز. سۇرانىس بولىپ جاتسا، الداعى كۇندەرى دە وسى جەردەن جۇك جونەلتىپ تۇرامىز»، - دەيدى ەلوردا تۇرعىنى نۇرسۇلتان عالىمجان.
