پرەزيدەنتتىك ادەبي سىيلىق كىمدەرگە بۇيىردى

بۇل تۋرالى ق ر مادەنيەت جانە اقپارات مينيسترلىگىنىڭ باسپا ءسوز قىزمەتى حابارلادى.

ءىس- شاراعا بەلگىلى اقىندار مەن جازۋشىلار، مادەنيەت قايراتكەرلەرى قاتىستى.

«ادەبيەت — ۇلتتىڭ جانى. ول ءاردايىم حالىقپەن بىرگە ۇزدىكسىز دامىپ وتىرادى. شىعارماشىل تۇلعانىڭ قالامىنان قاشالىپ شىققان تۋىندى قاي كەزدە دە الەمدىك كونتەكستەگى ۇلتتىڭ ەرەكشەلىگىن تانىتاتىنى ءسوزسىز. حاكىم اباي، مۇحتار اۋەزوۆ، قاسىم امانجولوۆ، جۇمەكەن ناجىمەدەنوۆ، مۇقاعالي ماقاتايەۆ سىندى ادەبيەت الىپتارىنىڭ شىعارمالارى ءوز ۋاقىتىنىڭ كوركەمدىك كوكجيەگىن كەڭەيتتى. رۋحانياتتىڭ وسىناۋ ۇلى كوشى ءوز ساپارىن توقتاتپاي، كەشە مەن بۇگىندى، بۇگىن مەن ەرتەڭدى جالعاپ كەلەدى. سوندىقتان ءبىز ءاردايىم جاس قالامگەرلەر شىعارماشىلىعىن ايرىقشا نازاردا ۇستايمىز»، — دەپ اتاپ ءوتتى مينيستر.

سونداي- اق مينيستر مەملەكەت تاراپىنان ەلىمىزدىڭ اقىن- جازۋشىلارىنىڭ تۋىندىلارىن باسىپ شىعارۋ ارقىلى ولارعا بەلسەندى تۇردە قولداۋ كورسەتەتىنىن ايتتى. جىل سايىن قوعامدىق ماڭىزى بار كىتاپتاردى ساتىپ الۋ، باسىپ شىعارۋ جانە تاراتۋ باعدارلاماسى بويىنشا قالامگەرلەردىڭ كىتاپتارى جارىق كورەدى. سوڭعى ەكى جىل ىشىندە ءۇش جۇزدەن استام جاڭا تۋىندى ءتول ادەبيەتىمىزدىڭ قورىن تولىقتىردى. ەل مادەنيەتىنىڭ دامۋىنا قوسىلعان قۇندى ۇلەس دەپ تانىلعان ادەبيەت پەن ونەر سالاسىنداعى ۇزدىك شىعارمالار ءۇشىن اباي اتىنداعى مەملەكەتتىك سىيلىق پەن «ايبوز» ۇلتتىق ادەبي سىيلىعى بەرىلەدى.

2023 -جىلى جاس قالامگەرلەرگە مەملەكەتتىك قولداۋ كورسەتۋ، دارىندى اقىن- جازۋشىلاردىڭ جاڭا بۋىنىن قالىپتاستىرۋ ماقساتىندا تۇڭعىش رەت پرەزيدەنتتىك ارناۋلى ادەبي سىيلىق تاعايىندالدى. ادەبي سىيلىق 18-35 جاسقا دەيىنگى قالامگەرلەرگە ارنالعان.

اۆتورلار بۇعان دەيىن حالىقارالىق جانە ۇلتتىق بايقاۋلارعا قاتىسپاعان ءوز شىعارمالارىن ۇسىنىپ، بارلىعى 53 ءوتىنىم قابىلداندى. ونىڭ ىشىندە «بالالار ادەبيەتى» نوميناتسياسىنا — 17، «دراماتۋرگيا» نوميناتسياسىنا — 9، «پوەزيا» نوميناتسياسىنا — 13، «پروزا» نوميناتسياسىنا — 14 ۇمىتكەر بار.

وتىنىمدەردىڭ بارلىعى ءجىتى قارالىپ، شىعارمانىڭ كوركەمدىك دەڭگەيى ارنايى ساراپتامادان ءوتتى.

مينيستر «قازاقستاننىڭ جاس جازۋشىلارى مەن اقىندارىنا ارنالعان پرەزيدەنتتىك ارناۋلى ادەبي سىيلىقتىڭ لاۋرەاتى» اتاعىنىڭ يەگەرلەرىنە ارنايى ديپلومدار مەن توسبەلگىلەر جانە اقشالاي سىيلىقتار تابىس ەتتى.

«پروزا» نوميناتسياسى بويىنشا جىلقىباي دوسحاننىڭ «كۆانت» تۋىندىسى، «پوەزيا» نوميناتسياسى بويىنشا ەدىلبەك دۇيسەنوۆتىڭ «قالالىق قۇستار» ولەڭدەر توپتاماسى، «دراماتۋرگيا» نوميناتسياسى بويىنشا ايتولقىن اشيموۆانىڭ «تاۋ كوتەرگەن تولاعاي» درامالىق تۋىندىسى، «بالالار ادەبيەتى» نوميناتسياسى بويىنشا ولجاس قاسىمنىڭ «اتىڭ وزسىن، ازامات!» توپتاماسى جۇلدەلى ورىنعا يە بولدى.

اۆتور

باقىتگۇل اباي قىزى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى