پرەزيدەنتتىڭ بەيجىڭدەگى بايانداماسى قىتايدا الەۋمەتتىك جەلىلەردىڭ باستى تاقىرىبى بولىپ تۇر
قازاقستان پرەزيدەنتى قاسىم- جومارت توقايەۆتىڭ قىتاي تىلىندەگى بايانداماسى جەرگىلىكتى الەۋمەتتىك جەلىلەردە ءالى دە باستى تاقىرىپتاردىڭ ءبىرى بولىپ تۇر.
جۋرناليست حۋ شيجيڭ جاريالاعان بەينەۇزىكپەن 500 دەن استام ادام بولىسكەن، دەپ حابارلايدى Kazinform.
18-قازاندا بەيجىڭدەگى «ءبىر بەلدەۋ، ءبىر جول» حالىقارالىق ىنتىماقتاستىعىنىڭ III فورۋمىنىڭ اشىلۋ راسىمىنە قاتىسقان قازاقستان پرەزيدەنتى بايانداماسىن قىتاي تىلىندە باستاعان بولاتىن. توقايەۆتىڭ ۆيدەوسى بىردەن قىتايداعى ءتۇرلى الەۋمەتتىك جەلىلەردە تارالىپ، زور قوشەمەتپەن قابىلداندى.
قىتايدىڭ «Weibo» پلاتفورماسىندا (Facebook- ءتىڭ قىتايلىق نۇسقاسى - رەد. ) جۋرناليست حۋ شيجيڭ جاريالاعان ۆيدەو 650 مىڭعا جۋىق رەت قارالعان. جەرگىلىكتى جەلى قولدانۋشىلارى قازاقستان پرەزيدەنتىنىڭ قىتاي ءتىلىن جەتىك مەڭگەرگەنىنە تاڭدانىس ءبىلدىرىپ جاتىر.
ءبىرى: «ونىڭ قىتايشاسى مەنىكىنەن دە جاقسى ەكەن»، - دەپ جازسا، ەندى ءبىرى: «داۋسى دا كەرەمەت»، - دەپ پىكىر بىلدىرەدى.
قاسىم- جومارت توقايەۆتىڭ «بەيجىڭ ءتىل جانە مادەنيەت ۋنيۆەرسيتەتىنىڭ ۇزدىك تۇلەگى» ەكەنى تۋرالى اقپارات جازعاندار دا بار.
قىتايداعى تاعى ءبىر تانىمال الەۋمەتتىك جەلى - «toutiao.com» دا ق. توقايەۆتىڭ قىتاي تىلىندە سويلەگەن ۆيدەوسىن سالىپ، 5 مىڭنان استام پىكىر مەن 48 مىڭنان استام لايك جيناعان.
«توقايەۆتىڭ سويلەۋ دەڭگەيى وتە جوعارى جانە ول قىتايشا وتە كۇشتى سويلەيدى! پرەزيدەنت مىرزا ءۇشىن لايك باسامىن»، - دەپ جازادى وقىرمانداردىڭ ءبىرى.
تاعى ءبىر ادام: «بۇل پرەزيدەنتتىڭ قىتايشا سويلەۋى ونى تىكەلەي حالىقپەن جاقىنداستىرىپ، دوستىق سەزىمىن تۋدىرادى. قازاقستان مەن قىتايدىڭ دوستىعى باياندى بولسىن دەپ تىلەيمىن!»- دەپ جازدى.
اۆتور
مۇحتار مۇرات
