پرەزيدەنت يوردانيا كورولىن قازاقستانعا شاقىردى
استانا. KAZINFORM - يوردانيا كورولى II ابداللا قازاقستان پرەزيدەنتى قاسىم-جومارت توقايەۆتىڭ ساپارى ەكى ەل اراسىنداعى ساياسي، ساۋدا-ەكونوميكالىق، ينۆەستيتسيالىق بايلانىستاردى ودان ءارى كەڭەيتۋگە مول مۇمكىندىك بەرەتىنىن مالىمدەدى.
«ءوزىڭىزدى جانە ءسىزدىڭ قۇرمەتتى دەلەگاتسياڭىزدى يوردانيادا قارسى العانىما قۋانىشتىمىن. بۇگىن ەكونوميكالىق بايلانىستاردى جانداندىرۋعا جانە جەكە سەكتور ءۇشىن مول مۇمكىندىكتەر اشىلادى. بۇل وتە ماڭىزدى»، - دەدى يوردانيا كورولى.
كەلىسسوز بارىسىندا تاراپتار ساۋدا، ينۆەستيتسيا، ونەركاسىپ، اۋىل شارۋاشىلىعى، كولىك- لوگيستيكا، تۋريزم، ەنەرگەتيكا، تسيفرلاندىرۋ جانە فارماتسيەۆتيكا سەكىلدى نەگىزگى سەكتورلارداعى ءوزارا ءتيىمدى ىنتىماقتاستىقتىڭ پەرسپەكتيۆاسىن ەگجەي-تەگجەيلى تالقىلادى.
ەكى ەلدىڭ مادەني-گۋمانيتارلىق ىقپالداستىعىن كەڭەيتۋ ماسەلەلەرىنە ايرىقشا ءمان بەرىلدى. قازىرگى كەزدە قازاقستاننىڭ مەديتسينالىق وقۋ ورىندارىندا يوردانيانىڭ 300 گە جۋىق ازاماتى ءبىلىم الىپ جاتىر.
سونىمەن قاتار، مەملەكەت باسشىسى مەن يوردانيا كورولى حالىقارالىق جانە وڭىرلىك قاۋىپسىزدىكتىڭ وزەكتى ماسەلەلەرى جونىندە پىكىر الماستى.
كەزدەسۋ سوڭىندا پرەزيدەنت يوردانيا كورولىن قازاقستانعا ساپارمەن كەلۋگە شاقىردى.
ايتا كەتەيىك، 18-اقپاندا پرەزيدەنت قاسىم-جومارت توقايەۆ يوردان حاشيميت كورولدىگىنە رەسمي ساپارمەن باردى. ءاليا پاتشايىم اتىنداعى حالىقارالىق اۋەجايدا مەملەكەت باسشىسىن حانزادا ءالي بەن ءال-حۋسەين مەن يوردانيا پرەمەر-ءمينيسترى جافار حاسان قارسى الدى.
بۇعان دەيىن پرەزيدەنت قاسىم-جومارت توقايەۆ يوردانيا قازاقستاننىڭ تاياۋ شىعىستاعى جانە اراب الەمىندەگى سەنىمدى سەرىكتەسى ەكەنىن مالىمدەدى.
يوردانيا - ەجەلگى ەسكەرتكىشتەرىمەن جانە تابيعي قورىقتارىمەن تانىمال، يوردان وزەنىنىڭ شىعىس جاعالاۋىنداعى اراب مەملەكەتى. ساۋد ارابياسىمەن، يراكپەن، سيريامەن، يزرايلمەن جانە پالەستينامەن شەكتەسەدى.
