پرەزيدەنت Yandex كومپانياسىنىڭ سيفرلىق ترانسفورماتسياعا قوسقان ۇلەسىنە جوعارى باعا بەردى
استانا. KAZINFORM - مەملەكەت باسشىسى «ياندەكس Global» كومپانياسىنىڭ باس ديرەكتورى دانيل شۋلەيكونى قابىلدادى، دەپ حابارلايدى اقوردانىڭ باسپا ءسوز قىزمەتى.
كەزدەسۋ بارىسىندا Yandex Qazaqstan كومپانياسى قىزمەتىنىڭ نەگىزگى باعىتتارى مەن جوسپارلارى قاراستىرىلدى. اتاپ ايتقاندا، كومپانيانىڭ ينتەرنەت-پلاتفورما ارقىلى حالىقتى جۇمىسپەن قامتۋ جانە جاساندى ينتەللەكت تەحنولوگياسىن دامىتۋ باستامالارىنا ايرىقشا نازار اۋدارىلدى.
قاسىم-جومارت توقايەۆ Yandex Qazaqstan كومپانياسىنىڭ سيفرلىق ترانسفورماتسياعا، شاعىن جانە ورتا بيزنەستى قولداۋعا، ازاماتتاردىڭ ءومىر ءسۇرۋ ساپاسىن جاقسارتۋعا قوسقان ۇلەسىنە جوعارى باعا بەردى.
بۇدان بولەك، مادەني مۇرانى وزىق تەحنولوگيالارمەن ينتەگراتسيالاۋ ماسەلەسى تالقىلاندى. پرەزيدەنت جاساندى ينتەللەكت قارقىندى دامىپ جاتقان كەزەڭدە مادەني بىرەگەيلىكتى ساقتاۋدىڭ، سونىمەن قاتار قازاق ءتىلى مەن مادەنيەتىن سيفرلىق كەڭىستىكتە ىلگەرىلەتۋدىڭ ءمانى زور ەكەنىن اتاپ ءوتتى.
- ءوز كەزەگىندە دانييل شۋلەيكو پلاتفورما ارقىلى جۇمىسپەن قامتۋ جوباسى ناتيجەسىندە 65 مىڭنان استام اۆتوكولىك جۇرگىزۋشىسى «ياندەكس. تاكسي» سەرىكتەسى رەتىندە الەۋمەتتىك قورعاۋعا يە بولعانىن جەتكىزدى. 2024-جىلى كومپانيا ەلىمىزگە 29,5 ميلليارد تەڭگە كولەمىندە سالىق تولەگەن، ال 2016-جىلدان بەرى قازاقستان ەكونوميكاسىنا 225 ميلليارد تەڭگەدەن استام ينۆەستيتسيا قۇيعان. سونىمەن قاتار «ياندەكس Global» باسشىسى استانادا جاڭا يننوۆاتسيالىق جوبالاردى ىسكە قوسۋ جوسپارى جونىندە بايانداپ، AI- Sana باعدارلاماسىنا اتسالىسۋعا دايىن ەكەنىن راستادى، - دەلىنگەن حابارلامادا.
بۇعان دەيىن پرەزيدەنت لەگيونەرلەردى بيۋجەتتەن قارجىلاندىرۋعا تىيىم سالاتىن زاڭعا قول قويعانىن جازعان ەدىك.
