پرەزيدەنت ولجاس بەكتەنوۆكە ەكونوميكانىڭ ناقتى سەكتورىن قولداۋدى تاپسىردى
استانا. KAZINFORM - مەملەكەت باسشىسى پرەمەر-مينيستر ولجاس بەكتەنوۆتى قابىلدادى. بۇل تۋرالى اقوردا ءمالىم ەتتى.
پرەزيدەنتكە ەلىمىزدىڭ الەۋمەتتىك-ەكونوميكالىق دامۋى، وركەندەۋدىڭ جاڭا باعىتتارى جانە ەكونوميكالىق رەفورمالاردى جۇزەگە اسىرۋ جۇمىستارى جونىندە باياندالدى. بيىلعى قاڭتار-اقپان ايلارىندا ەكونوميكانىڭ ءوسىمى 5,4 پايىزدى قۇرادى.
پرەمەر-مينيستر ۇلتتىق قۇرىلتايدىڭ ءتورتىنشى وتىرىسىندا مەملەكەت باسشىسى جۇكتەگەن ءىرى ينفراقۇرىلىمدىق جانە ەنەرگەتيكالىق جوبالاردى ىسكە اسىرۋعا، سيفرلاندىرۋ مەن ادامي كاپيتالدى دامىتۋعا قاتىستى مىندەتتەردى ورىنداۋ ءۇشىن قابىلدانىپ جاتقان شارالار تۋرالى مالىمەت بەردى.
قاسىم-جومارت توقايەۆ ۇكىمەت باسشىسى جەتەكشىلىك ەتەتىن رەسپۋبليكالىق شتابتىڭ سۋ تاسقىنىنا قارسى ءىس-شارالار جونىندەگى ەسەبىن تىڭدادى. جاعداي تاۋلىك بويى باقىلاۋعا الىنعان. 37 مىڭنان استام قىزمەتكەر مەن 13 مىڭ تەحنيكا دايىندالدى.
كەزدەسۋ سوڭىندا مەملەكەت باسشىسى ەكونوميكانىڭ ناقتى سەكتورىن قولداۋ، ينۆەستيتسيا تارتۋ جانە الەۋمەتتىك ساياساتتى جەتىلدىرۋ جۇمىستارىن جالعاستىرۋدى تاپسىردى.
بۇعان دەيىن حابارلانعانداي، قاسىم-جومارت توقايەۆ پەن شاۆكات ميرزيەيەۆ تەلەفون ارقىلى سويلەسىپ، ءبىر-ءبىرىن كەلە جاتقان ناۋرىز مەيرامىمەن قۇتتىقتاعان بولاتىن.
