پرەزيدەنت تاپسىرماسى: ۇكىمەت ونەركاسىپ قاۋىپسىزدىگىن قامتاماسىز ەتۋ باعىتىندا قانداي جۇمىستار اتقارماق
استانا. KAZINFORM - پرەمەر- مينيستر ولجاس بەكتەنوۆ مەملەكەت باسشىسىنىڭ قاۋىپتى وندىرىسكە تارتىلعان ازاماتتاردىڭ قاۋىپسىزدىگىن قامتاماسىز ەتۋ جونىندەگى تاپسىرمالارىن جۇزەگە اسىرۋ ماسەلەلەرى بويىنشا جۇمىس كەڭەسىن وتكىزدى، دەپ حابارلايدى ۇكىمەتتىڭ باسپا ءسوز قىزمەتى.
توتەنشە جاعدايلار ءمينيسترى شىڭعىس ءارىنوۆ، ونەركاسىپ جانە قۇرىلىس ءمينيسترى قانات شارلاپايەۆ جاڭا تاسىلدەر جانە ەڭبەك قاۋىپسىزدىگى سالاسىنداعى اتقارىلىپ جاتقان جۇمىستار تۋرالى باياندادى. كەڭەسكە ەڭبەك جانە حالىقتى الەۋمەتتىك قورعاۋ، سونداي-اق سيفرلىق دامۋ، يننوۆاتسيالار جانە اەروعارىش ونەركاسىبى مينيسترلەرى قاتىستى.
2030 -جىلعا دەيىنگى قاۋىپسىز ەڭبەك تۇجىرىمداماسى اياسىندا نىسانداردى سيفرلاندىرۋدى ەسكەرە وتىرىپ، نورماتيۆتىك-قۇقىقتىق اكتىلەر قايتا قارالادى، ونەركاسىپ قاۋىپسىزدىگىن، عىلىمدى دامىتۋدى جانە ءتيىستى ورتالىقتار قۇرۋدى قامتاماسىز ەتەتىن نىساندارعا قويىلاتىن، سونداي- اق مەملەكەتتىك ەڭبەك ينسپەكتورىنىڭ كادرلىق الەۋەتى مەن قۇقىقتىق مارتەبەسىن ارتتىرۋ جونىندەگى تالاپتار كۇشەيتىلەدى.
قازىرگى ۋاقىتتا ونەركاسىپ قاۋىپسىزدىگى بويىنشا جەكەلەگەن تالاپتار قايتا قارالۋدا. وسىلايشا، ازاماتتىق قورعاۋ جونىندەگى زاڭ جوباسى شەڭبەرىندە اپاتتىق- قۇتقارۋ قىزمەتتەرىنە قويىلاتىن تالاپتار قاتاڭداتىلادى، ءتيىستى قىزمەتتەردىڭ فۋنكتسيالارىن بەرۋ ارقىلى وندىرىستىك باقىلاۋعا قويىلاتىن جەكەلەگەن تالاپتار كۇشەيتىلۋدە، سونداي- اق ءقاۋىپتى وندىرىستىك نىساندار يەلەرىنە جابدىقتاردى جاڭارتۋ جانە جاڭعىرتۋ بويىنشا جاڭا مىندەتتەر كوزدەلگەن.
سونىمەن قاتار ونەركاسىپتىك قاۋىپسىزدىك نىساندارى پاسپورتتارىن جاساۋعا، اپاتتاردى ەسەپكە الۋدى جانە باسقا دا پروتسەستەردى اۆتوماتتاندىرۋعا مۇمكىندىك بەرەتىن «ە- و ق ك» اقپاراتتىق جۇيەسىن ىسكە قوسۋ جوسپارلانىپ وتىر.
پرەمەر- مينيستر ونەركاسىپ قاۋىپسىزدىگى سالاسىنداعى باقىلاۋ تەتىگىنە ەرەكشە نازار اۋداردى. توتەنشە جاعدايلار مينيسترلىگى ءو ق م جانە ە ح ا ق م- مەن بىرلەسىپ، تەكسەرۋ قورىتىندىسى بويىنشا ونەركاسىپتىك نىساندار مەنشىك يەلەرى مەن باسشىلارىنىڭ قاۋىپسىز ەڭبەك جاعدايلارىن قامتاماسىز ەتۋ بويىنشا جاۋاپكەرشىلىگىن كۇشەيتۋ جونىندە ۇسىنىستار ەنگىزۋ تاپسىرىلدى.
ونەركاسىپ جانە قۇرىلىس مينيسترلىگى توتەنشە جاعدايلار، ەكولوگيا جانە تابيعي رەسۋرستار مينيسترلىكتەرىمەن بىرلەسىپ، ونەركاسىپ قاۋىپسىزدىگى ءىس- شارالارىن ۋاقتىلى قارجىلاندىرۋ ءۇشىن جەر قويناۋىن پايدالانۋشىلاردىڭ تاۋ-كەن جۇمىستارىن جۇرگىزۋ جوسپارلارىنا تالداۋ جۇرگىزۋى قاجەت.
ونەركاسىپ جانە قۇرىلىس، توتەنشە جاعدايلار مينيسترلىكتەرى گازدار شىعارىندىلارىمەن بايلانىستى تاۋەكەلدەردى ازايتۋ ءۇشىن شاحتالاردى الدىن الا گازسىزداندىرۋ نورماتيۆتەرىن ازىرلەۋى قاجەت.
س د ي ا و م وتاندىق IT ماماندارمەن بىرلەسىپ، ونەركاسىپ قاۋىپسىزدىگىن قامتاماسىز ەتۋ بويىنشا جاڭا شەشىمدەر ازىرلەۋ تاپسىرىلدى.
ايتا كەتەيىك، مەملەكەت باسشىسى وسىعان دەيىن ۇلىتاۋ وبلىسىنداعى «قازاقمىس» كورپوراتسياسىنا قاراستى كەنىشتە بولعان قايعىلى وقيعاعا بايلانىستى ۇكىمەتكە ءبىرقاتار مىندەت جۇكتەگەن بولاتىن.
