پرەزيدەنت Svevind Energy Group كومپانياسىنىڭ باس ديرەكتورىن قابىلدادى
مەملەكەت باسشىسى Svevind Energy Group كومپانياسىنىڭ باس ديرەكتورى ۆولفگانگ كروپپتى قابىلدادى، دەپ حابارلايدى
Svevind Energy Group كومپانياسىنىڭ باسشىلىعىمەن كەزدەسۋ بارىسىندا ماڭعىستاۋ وبلىسىندا «جاسىل» سۋتەگىن ءوندىرۋ جونىندەگى جوبانى جۇزەگە اسىرۋعا دايىندىق ماسەلەلەرى تالقىلاندى.
مەملەكەت باسشىسىنا ەۋروپالىق كەڭەس پرەزيدەنتى شارل ميشەلدىڭ بىلتىر قازاقستانعا جاساعان ساپارى بارىسىندا قول قويىلعان ينۆەستيتسيالىق كەلىسىم اياسىندا الدىن الا جوبالاۋ-ىزدەستىرۋ جۇمىستارى (Pre-FEED) جۇرگىزىلە باستاعانى جونىندە مالىمەت بەرىلدى.
جوبا اياسىندا سۋ تۇشىتۋ زاۋىتىن، 40 گيگاۆاتتىق جاڭارتىلاتىن ەنەرگيا كوزدەرى (جەل، كۇن) ستانسيالارىن، سونداي-اق قۋاتى 20 گ ۆ ت بولاتىن ءارى جىلىنا 2 ميلليون توننا «جاسىل» سۋتەگىن نەمەسە 11 ميلليون توننا «جاسىل» اممياك وندىرە الاتىن سۋدى ەلەكتروليزدەۋ قوندىرعىسىن سالۋ جانە پايدالانۋ كوزدەلىپ وتىر. ينۆەستيتسيانىڭ الدىن الا بولجامدى كولەمى 50 ميلليارد ەۆرودان اسادى.
ۆولفگانگ كروپپ جوبالىق قۇجاتتاما 2026-جىلعا قاراي اياقتالاتىنىن ايتتى. ينفراقۇرىلىم قۇرىلىسىن 2027-جىلى باستاپ، 2032-جىلى پايدالانۋعا بەرۋ جوسپارلانعان.
قاسىم-جومارت توقايەۆ ەلىمىز ءۇشىن Hyrasia One جوباسىن ۋاقتىلى جۇزەگە اسىرۋدىڭ ستراتەگيالىق ماڭىزى زور ەكەنىن اتاپ ءوتتى.
مەملەكەت باسشىسى اتالعان باستاما قازاقستانداعى جاڭارتىلاتىن ەنەرگيا كوزدەرى سالاسىن دامىتۋدا جەتەكشى جوبالاردىڭ ءبىرى بولاتىنىنا ءارى ەلىمىزدىڭ كومىرتەگى بەيتاراپتىعىنا قول جەتكىزۋ ماقساتىنا ەلەۋلى ۇلەس قوساتىنىنا سەنىم ءبىلدىردى.
