پرەزيدەنت ساۋد ارابياسىنىڭ تاق مۇراگەرى مۇحاممەد بەن سالمان بەن ابدەلازيز ءال ساۋدپەن كەزدەستى
استانا. KAZINFORM - پرەزيدەنت رياد قالاسىندا One Water سامميتىن ۇيىمداستىرۋعا قولداۋ كورسەتكەنى ءۇشىن قوس كيەنىڭ ساقشىسى، ساۋد ارابياسىنىڭ كورولى سالمان بەن ابدەلازيز ءال ساۋدقا جانە ساۋد ارابياسىنىڭ تاق مۇراگەرى، پرەمەر-ءمينيسترى مۇحاممەد بەن سالمان بەن ابدەلازيز ءال ساۋدقا العىس ايتتى.
مەملەكەت باسشىسى قازاقستان مەن فرانسيانىڭ توراعالىعىمەن ءوتىپ جاتقان سامميت الەمدەگى ەكولوگيالىق كۇن ءتارتىبىن ىلگەرىلەتۋگە ەلەۋلى ۇلەس قوساتىنىنا سەنىم ءبىلدىردى. بۇل تۋرالى اقوردانىڭ باسپا ءسوز قىزمەتى مالىمدەدى.
قاسىم-جومارت توقايەۆ بيىل قازاقستان مەن ساۋد ارابياسىنىڭ اراسىندا ديپلوماتيالىق قارىم-قاتىناس ورناعانىنا 30 جىل تولعانىن اتاپ ءوتتى. پرەزيدەنتتىڭ ايتۋىنشا، وسى كەزەڭدە ەكى ەل اراسىندا سەنىمدى ساياسي ديالوگ جولعا قويىلىپ، بەرىك قۇقىقتىق بازا قالىپتاستى. سونداي-اق ءبىرقاتار ينۆەستيتسيالىق جوبالار جۇزەگە استى.
كەزدەسۋ بارىسىندا ەنەرگەتيكا، مۇناي- گاز ونەركاسىبى، كولىك-لوگيستيكا سالالارىنداعى ساۋدا-ەكونوميكالىق جانە ينۆەستيتسيالىق ىنتىماقتاستىق ماسەلەلەرى قاراستىرىلدى.
تاق مۇراگەرى مۇحاممەد بەن سالمان بەن ابدەلازيز ءال ساۋد قازاقستاندى ساۋد ارابياسىنىڭ ورتالىق ازياداعى ماڭىزدى سەرىكتەسى دەپ اتادى. پرەمەر-ءمينيستردىڭ پىكىرىنشە، ەكى ەلدىڭ ساۋدا-ەكونوميكالىق جانە ينۆەستيتسيالىق بايلانىستارىن قارقىندى تۇردە دامىتۋعا مول مۇمكىندىك بار.
اڭگىمەلەسۋ بارىسىندا وڭىرلىك جانە حالىقارالىق كۇن تارتىبىندەگى وزەكتى تاقىرىپتار تالقىلاندى.
ەسكە سالا كەتەيىك، مەملەكەت باسشىسى قاسىم-جومارت توقايەۆ One Water سامميتىنە قاتىسۋ ءۇشىن ساۋد ارابياسىنا جۇمىس ساپارىمەن باردى.
قاسىم-جومارت توقايەۆ One Water ءسامميتى اياسىندا دۇنيەجۇزىلىك بانك توبىنىڭ پرەزيدەنتى ادجاي بانگامەن كەزدەستى.
مەملەكەت باسشىسى ورتاق سۋرەتكە ءتۇسۋ راسىمىنە قاتىستى.
پرەزيدەنت ساۋد ارابياسىنىڭ استاناسىندا ءوتىپ جاتقان One Water سامميتىنىڭ اشىلۋ سالتاناتىندا ءسوز سويلەدى.
