پرەزيدەنت ەۋرازيالىق دامۋ بانكىنىڭ باسقارما ءتوراعاسىن قابىلدادى

ەۋرازيالىق دامۋ بانكى (ە ا د ب) قازاقستان ەكونوميكاسىنا بىلتىر 1,4 ميلليارد دوللار قارجى سالعان، ال ينۆەستيتسيا پورتفەلىندەگى قازاقستاندىق جوبالاردىڭ ۇلەسى 60 پايىزعا جەتكەن.

قازاقستان رەسپۋبليكاسى بويىنشا 2022-2026 -جىلدارعا ارنالعان ستراتەگيا اياسىندا اتالعان بانك ەلىمىزگە 3,8 ميلليارد دوللار ينۆەستيتسيا قۇيۋدى جوسپارلاعان بولاتىن. قاسىم-جومارت توقايەۆقا بۇل مەجە مەرزىمىنەن بۇرىن ورىندالعانى تۋرالى مالىمەت بەرىلدى. بيىل بانككە جالپى سوماسى 4,5 ميلليارد دوللاردان اساتىن جوبالار ۇسىنىلدى. ەۋرازيالىق دامۋ بانكى ەنەرگەتيكالىق نىسانداردى جاڭعىرتۋ جانە جاڭارتىلاتىن ەنەرگيا كوزدەرىن، كولىك جانە لوگيستيكا سالالارىن دامىتۋ باعىتتارىنا، سونىڭ ىشىندە رەسپۋبليكالىق ماڭىزى بار جولداردى جوندەۋگە، ينفراقۇرىلىم نىساندارى قۇرىلىسىنا، ونەركاسىپ جانە سيفرلىق تەحنولوگيالارعا قاتىستى جوبالارعا 1 ميلليارد دوللاردان استام ينۆەستيتسيا سالۋدى كوزدەپ وتىر.

نيكولاي پودگۋزوۆتىڭ ايتۋىنشا، ە ا د ب سەرىكتەستەرمەن جانە كوپجاقتى ۇيىمدارمەن تىعىز قارىم-قاتىناستا جۇمىس ىستەپ، سونداي-اق وزدەرى ۇيىمداستىراتىن حالىقارالىق ءىس-شارالار ارقىلى قازاقستاننىڭ قارجى نارىعىن دامىتۋ جانە ينۆەستيتسيا تارتۋ ىسىنە بەلسەندى اتسالىسۋعا نيەتتى.

مەملەكەت باسشىسى بانكتىڭ قازاقستان ەكونوميكاسىن دامىتۋعا قوسقان ۇلەسىن جوعارى باعالاپ، ىنتىماقتاستىقتى ودان ءارى نىعايتۋعا بەيىل ەكەنىن راستادى.

ەۋرازيالىق دامۋ بانكى - ينۆەستيتسيالىق قىزمەتىن ەۋرازيا كەڭىستىگىندە جۇرگىزەتىن كوپجاقتى دامۋ بانكى. ونىڭ شتاب- پاتەرى الماتى قالاسىندا ورنالاسقان. 2025 -جىلى ە ا د ب پورتفەلىنە جالپى ينۆەستيتسيا سوماسى 16,5 ميلليارد دوللار بولاتىن 305 جوبا ەندى. بانك ءوز جۇمىسىندا كولىك ينفراقۇرىلىمى، تسيفرلاندىرۋ، جاسىل ەنەرگەتيكا، اۋىل شارۋاشىلىعى، ونەركاسىپ جانە ماشينا جاساۋ سالالارىنداعى ينتەگراتسياعا ءتيىمدى اسەر ەتەتىن جوبالارعا باسىمدىق بەرەدى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى