پرەزيدەنت قوعامدا قىزۋ تالقىلانىپ جاتقان سالىق رەفورماسىنا قاتىستى پىكىرىن ايتتى
بۋراباي. KAZINFORM - سوندىقتان رەفورمانىڭ ءمانىن ادامعا تۇسىنىكتى تىلمەن جەتكىزۋ كەرەك. بۇل تۋرالى بۋرابايدا ءوتىپ جاتقان ۇلتتىق قۇرىلتايدىڭ IV وتىرىسىندا مەملەكەت باسشىسى قاسىم-جومارت توقايەۆ ءمالىم ەتتى.
- ەندى ءبىرقاتار ماسەلەگە ارنايى توقتالىپ وتكىم كەلەدى. ەڭ الدىمەن قوعامدا قىزۋ تالقىلانىپ جاتقان سالىق رەفورماسىنا قاتىستى پىكىرىمدى ايتايىن. سالىق جۇيەسى، بۇل - بۇكىل مەملەكەتتىك جۇيەنىڭ تىرەگى. بيۋجەتتە قارجى بولماسا، مەملەكەت ءوز مىندەتىن تولىق اتقارا المايدى، الەۋمەتتىك مىندەتتەمەلەر دە ورىندالمايدى. بۇل تۋرالى جاڭا عانا بەلگىلى ەكونوميست جاقسىبەك قۇلەكەيەۆ جاقسى ايتىپ ءوتتى. سونداي-اق قۇرىلتاي مۇشەلەرى قايىربەك ارىستانبەكوۆ، مارات باشيموۆ، ەرلان سايروۆ، راسۋل رىسمامبەتوۆ جانە مۇرات ابەنوۆ سالىق-بيۋجەت ماسەلەسىنە قاتىستى ورىندى پىكىر ءبىلدىردى، - دەدى قاسىم-جومارت توقايەۆ.
پرەزيدەنتتىڭ ايتۋىنشا، ەلىمىز ءۇشىن اسا قاجەت شارالاردىڭ ءمان-ماڭىزىن حالىققا ەگجەي-تەگجەيلى ءتۇسىندىرۋ كەرەك.
- جۇرتتىڭ ءبارى ەكونوميست نەمەسە قارجىگەر ەمەس. مەملەكەتتىڭ قانداي شارانى نە ءۇشىن قولعا الىپ جاتقانىن ءبارى بىردەي تۇسىنە بەرمەۋى مۇمكىن. سوندىقتان رەفورمانىڭ ءمانىن ادامعا تۇسىنىكتى تىلمەن جەتكىزۋ كەرەك، - دەدى مەملەكەت باسشىسى.
بۇدان بۇرىن حابارلانعانداي، بۋرابايدا پرەزيدەنت قاسىم-جومارت توقايەۆتىڭ قاتىسۋىمەن ۇلتتىق قۇرىلتايدىڭ IV وتىرىسى باستالدى.
