پرەزيدەنت قازاقستاندىقتاردىڭ ۇلتتىق ارمان-مۇراتىن اتادى

- ءبىزدىڭ ۇلتىمىزدىڭ ارمان-مۇراتى ادىلەتتى، قاۋىپسىز، تازا، قۋاتتى قازاقستاندى قۇرۋ يدەياسىنان باستاۋ الادى. ءبىز بارشاعا جانە اركىمگە زور مۇمكىندىك بەرەتىن مەملەكەت قۇرىپ جاتىرمىز. بۇل - ءار ازامات ءوز قابىلەتىن شىڭداپ، ادال ەڭبەگىمەن وتباسىن اسىراي الاتىن ەل بولۋ دەگەن ءسوز. زاڭ جانە ءتارتىپ - ءبىزدىڭ مىزعىماس تۇعىرىمىز. بۇل، ەڭ الدىمەن، ەلىمىزدىڭ ءار ازاماتىنا جانە بارشا حالقىمىزعا ورتاق ءتارتىپ. ال ءبىزدىڭ يدەولوگيامىز - قاراپايىم ءارى تۇسىنىكتى. بۇل - جاھانداعى اسا كۇردەلى گەوساياسي احۋالدا ەلىمىزدى جاڭا دامۋ دەڭگەيىنە كوتەرۋ ءۇشىن بەرىك نەگىز قالاۋ دەگەن ءسوز، - دەدى قاسىم-جومارت توقايەۆ.

پرەزيدەنتتىڭ پايىمداۋىنشا، مەملەكەتتىڭ تاعدىرى مەن ۇلتىمىزدىڭ بەرەكەلى ءومىرى وسىعان تىكەلەي بايلانىستى.

- سىزدەر ۇلتتىق قۇرىلتاي اياسىندا كوپتەگەن باستاما كوتەرىپ، يگى ىستەرگە ۇيىتقى بولىپ جۇرسىزدەر. وتانشىل ازاماتتاردىڭ ارقاسىندا ەلىمىز تۇراقتى دامىپ كەلەدى. بارشاڭىزعا شىنايى ريزاشىلىعىمدى بىلدىرەمىن. بۇگىن ءبىرشاما وزەكتى ماسەلەلەر تالقىعا ءتۇستى. الداعى ۋاقىتتا دا وسىلاي بەرەكە-بىرلىكتە بولىپ، ەلىمىزدىڭ بولاشاعى ءۇشىن ماڭىزدى جۇمىستاردى بىرگە اتقارا بەرەمىز دەپ سەنەمىن، - دەپ تۇيىندەدى مەملەكەت باسشىسى.

ايتا كەتۋ كەرەك، قۇرىلتايدىڭ پانەلدىك سەسسيالارى كەشە باستالعان. ول سەكسيالاردىڭ تاقىرىپتارى ازاماتتىق قوعام، مادەنيەت، ونەر، رۋحانيات، ءبىلىم جانە عىلىم، الەۋمەتتىك-ەكونوميكالىق دامۋ ماسەلەلەرىن قامتىدى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى