پرەزيدەنت: قازاقستاندا العاشقى فرانسۋز بانكىنىڭ اشىلۋىن قۋانا قۇپتار ەدىك
پرەزيدەنت ەلىمىزدىڭ ترانسكاسپي حالىقارالىق كولىك باعىتىن نەمەسە «ورتا ءدالىزدى» دامىتۋعا بارىنشا كۇش سالىپ وتىرعانىنا نازار اۋداردى، دەپ حابارلايدى Kazinform اقوردانىڭ باسپا ءسوز قىزمەتىنە سىلتەمە جاساپ.
«بۇل - ەۋروپا مەن ازيا اراسىنداعى سەنىمدى جەتكىزۋ تىزبەگىن قامتاماسىز ەتەتىن ەڭ قىسقا ءارى اناعۇرلىم ومىرشەڭ باعدار. تاسىمال كولەمى ءوسىپ كەلەدى. سوندىقتان ءبىز جىل سايىنعى جۇك تاسىمالىن 10 ميلليون تونناعا دەيىن جەتكىزۋ ءۇشىن سەرىكتەستەرىمىزبەن بىرگە ينفراقۇرىلىمدى جاڭعىرتۋ جۇمىستارىنا بەلسەندى كىرىستىك. ەندى بۇل باعىتتاعى ءىس-ارەكەتىمىزدى ترانسەۋروپالىق كولىك جەلىسىمەن جانە ەۋروپا وداعىنىڭ «جاھاندىق قاقپا» باستاماسىمەن ۇشتاستىرۋ ماڭىزدى»، - دەدى قاسىم-جومارت توقايەۆ.
مەملەكەت باسشىسىنىڭ پىكىرىنشە، بيوتەحنولوگيا جانە مەديتسينا سالالارىنداعى ىنتىماقتاستىقتى جولعا قويۋ ءۇشىن مۇمكىندىك مول. بيوتەحنولوگيا كلاستەرىن دامىتۋ ماقساتىندا ۇلتتىق «QazBioPharm» بيوفارماتسيەۆتيكالىق حولدينگى قۇرىلدى. پرەزيدەنت كوپتەگەن جەتەكشى كومپانيالار قازاقستاندا ءدارى-دارمەك پەن مەديتسينالىق قۇرىلعى ءوندىرىسىن دامىتۋدى جوسپارلاپ وتىرعانىن اتاپ ءوتىپ، فرانتسۋز كومپانيالارىن دا وسى باعىتتاعى ىقپالداستىققا شاقىردى.
قاسىم-جومارت توقايەۆ ءسوزىن قورىتىندىلاي كەلە، «استانا» حالىقارالىق قارجى ورتالىعىنىڭ ينۆەستيتسيا تارتۋ ىسىندەگى ارتىقشىلىقتارىنا توقتالدى.
«بۇگىندە الەمنىڭ 78 ەلىندە بازاسى بار 2100 دەن استام كومپانيا ا ح ق و- دا جۇمىس ىستەيدى. ولار تەك قازاقستانعا عانا ەمەس، بۇكىل وڭىرگە ينۆەستيتسيالىق كاپيتال تارتۋعا ىقپال ەتىپ وتىر. ءبىز ا ح ق و- داعى فرانسۋز كومپانيالارىنىڭ سانى ارتۋىن جانە قازاقستاندا العاشقى فرانسۋز بانكىنىڭ اشىلۋىن قۋانا قۇپتار ەدىك. بۇل قادام ءبىزدىڭ ينۆەستيتسيا جانە قارجى سالالارىنداعى ىنتىماقتاستىعىمىزعا تىڭ سەرپىن بەرەدى»، - دەدى پرەزيدەنت.
