پرەزيدەنت قازاقستان مەن كيپر اراسىنداعى سوتتالعان ادامداردى بەرۋگە قاتىستى قۇجاتقا قول قويدى
استانا. KAZINFORM - مەملەكەت باسشىسى «قازاقستان رەسپۋبليكاسى مەن كيپر رەسپۋبليكاسى اراسىنداعى سوتتالعان ادامداردى بەرۋ تۋرالى كەلىسىمدى راتيفيكاتسيالاۋ تۋرالى» قازاقستان رەسپۋبليكاسىنىڭ زاڭىنا قول قويدى.
بۇل تۋرالى اقوردانىڭ باسپا ءسوز قىزمەتى حابارلادى.
زاڭنىڭ ءماتىنى باسپا سوزدە جاريالانادى.
بۇل كەلىسىمگە 2024-جىلعى 25-ناۋرىزدا استانا قالاسىندا قول قويىلدى.
كەلىسىمگە سايكەس تاراپتار باس بوستاندىعىنان ايىرۋعا ۇكىم شىعارىلعان ادامدارعا قاتىستى جازانى نەمەسە ونىڭ جازاسىنىڭ قالعان مەرزىمىن ءوز مەملەكەتىندە ودان ءارى وتەۋ ءۇشىن ءبىر-بىرىنە سوتتالعان ادامداردى بەرۋگە مىندەتەلەدى. قازاقستان تاراپىنان سوتتالعان ادامداردى بەرۋ تۋرالى شەشىمنىڭ ورىندالۋىنا جاۋاپتى قۇزىرەتتى ورگان رەتىندە قازاقستان رەسپۋبليكاسىنىڭ باس پروكۋراتۋراسى بەلگىلەنەدى. قۇجاتتا سوتتالعان ادامداردى بەرۋ جانە ودان باس تارتۋ ءۇشىن ناقتى نەگىزدەر كوزدەلگەن.
وسىعان دەيىن پرەزيدەنت لەگيونەرلەردى بيۋجەتتەن قارجىلاندىرۋعا تىيىم سالاتىن زاڭعا قول قويعانى تۋرالى جازدىق.
