پرەزيدەنت: «قازاقستان بالالارى» اتتى ءبىرتۇتاس باعدارلاما قابىلداعان ءجون
بۋراباي. KAZINFORM - بىلىممەن قاتار تاربيەگە ايرىقشا نازار اۋدارۋ وتە ماڭىزدى. بۇل تۋرالى بۋرابايدا ءوتىپ جاتقان ۇلتتىق قۇرىلتايدىڭ IV وتىرىسىندا مەملەكەت باسشىسى قاسىم-جومارت توقايەۆ ءمالىم ەتتى.
- جەرگىلىكتى بيلىك وكىلدەرى مەن قوعام بەلسەندىلەرى تۇرمىستىق زورلىق-زومبىلىقتىڭ الدىن الۋ جۇمىسىنان شەت قالىپ وتىر. ونىڭ ۇستىنە، وسى باعىتتاعى جۇمىستار قازىر ءارتۇرلى قۇجاتپەن رەتتەلەدى. شاشىراڭقى بولىپ تۇر ءبارى. سونىڭ ءبارىن ءبىر جەرگە جيناقتاعان دۇرىس دەپ ويلايمىن. وسىعان وراي «قازاقستان بالالارى» اتتى ءبىرتۇتاس باعدارلاما قابىلداعان ءجون. بۇل وتە ماڭىزدى قۇجات بولماق. ونى دايىنداۋ ءۇشىن ۇكىمەت پەن پارلامەنت دەپۋتتارى، ومبۋدسمەن دينارا زاكيەۆا، قوعام قايراتكەرلەرى ءوز ۇلەسىن قوسادى دەپ ويلايمىن، - دەدى قاسىم-جومارت توقايەۆ.
پرەزيدەنتتىڭ ايتۋىنشا، وزىق ويلى ۇرپاق ءوسىرۋ ءۇشىن ءبىلىم مەن تاربيە ءاردايىم قاتار ءجۇرۋى كەرەك.
- اشىعىن ايتساق، بالا وقىتۋ ىسىندە بۇعان دەيىن بىلىمگە كوبىرەك نازار اۋدارىلدى. ال ۇرپاق تاربيەسىنە قاتىستى جۇيەلى ۇستانىم بولعان جوق. بۇل سالاعا ءتيىستى دەڭگەيدە كوڭىل بولىنبەي كەلدى. «تاربيەسىز بەرىلگەن ءبىلىم - ادامزاتتىڭ قاس جاۋى». سوندىقتان بىلىممەن قاتار تاربيەگە ايرىقشا نازار اۋدارۋ وتە ماڭىزدى، - دەدى مەملەكەت باسشىسى.
بۇدان بۇرىن حابارلانعانداي، پرەزيدەنت قوعامدا قىزۋ تالقىلانىپ جاتقان سالىق رەفورماسىنا قاتىستى پىكىرىن ايتتى.
سونىمەن قاتار، پرەزيدەنت مەكتەپتەرگە ەنگىزىلەتىن «ادال ازامات» باعدارلاماسىن قولدادى.
بىلتىر قولعا الىنعان «ءبىرتۇتاس تاربيە» باعدارلاماسى جەكەمەنشىك مەكتەپتەردى دە قامتۋى كەرەك. بۇل تۋرالى بۋرابايدا ءوتىپ جاتقان ۇلتتىق قۇرىلتايدىڭ IV وتىرىسىندا مەملەكەت باسشىسى قاسىم-جومارت توقايەۆ ءمالىم ەتتى.
− بىلتىر مەكتەپتەردە «ءبىرتۇتاس تاربيە» باعدارلاماسى قولعا الىندى. باعدارلامانى قابىلداۋ - ءىستىڭ باسى عانا. ەندى جاڭارعان قۇجاتتى ەلىمىزدەگى بارلىق مەملەكەتتىك ءبىلىم وشاعىنا ەنگىزۋ كەرەك. بۇل قۇجاتتى الداعى ۋاقىتتا جەكەمەنشىك مەكتەپتەر دە باسشىلىققا الۋعا ءتيىس. سەبەبى تاربيە جۇمىسى بالالاردى تۇگەل قامتۋى قاجەت، - دەدى قاسىم-جومارت توقايەۆ.
پرەزيدەنتتىڭ ايتۋىنشا، سوندا عانا بۇل باستاما جالپىۇلتتىق اۋقىمعا يە بولادى.
- جوبانىڭ تۇپكى ماقساتى - وتانشىل، ءبىلىمدى، جاسامپاز ۇرپاق تاربيەلەۋ. مۇنىڭ ءبارى - ادال ازاماتقا ءتان قاسيەتتەر. قۇرىلتاي مۇشەلەرى الداعى ۋاقىتتا وسى باعدارلامانى «ادال ازامات» دەپ اتاۋدى ۇسىنىپ وتىر. مەن بۇل ۇسىنىسپەن تولىق كەلىسەمىن، - دەدى مەملەكەت باسشىسى. ەسكە سالساق، بۇدان بۇرىن قاسىم-جومارت توقايەۆ بۋرابايدا وتەتىن ۇلتتىق قۇرىلتايدىڭ IV وتىرىسىنا قاتىساتىنى حابارلانعان ەدى.
ۇلتتىق قۇرىلتاي جاندانعالى ەلدەگى الەۋمەتتىك- ەكونوميكالىق ماسەلەلەر شەشىم تاۋىپ كەلەدى.
جىل وتكەن سايىن تاقىرىپ اياسى كەڭىدى، ايتىلاتىن سالماقتى وي ۇلعايدى. القالى جيىندا نازاردا بولعان كەمشىلىكتى تۇزەتۋ زاڭ شەڭبەرىندە بەكىپ، قوعامنىڭ وڭ باعىتقا بەت العانىن بايقايمىز. وسى ورايدا Kazinform ءتىلشىسى وتكەن قۇرىلتايلاردىڭ ناتيجەسىنە كوز جۇگىرتتى.
