پرەزيدەنت قاۋىپسىزدىك كەڭەسىندە مينيسترلىكتەر جۇمىسىن سىنعا الدى - رۋسلان جەلدىباي
استانا. KAZINFORM - پرەزيدەنت كەڭەسشىسى - باسپاءسوز حاتشىسى رۋسلان جەلدىباي مەملەكەت باسشىسىنىڭ قازاقستان رەسپۋبليكاسى قاۋىپسىزدىك كەڭەسىنىڭ وتىرىسىن وتكىزگەنىن جازدى.
ونىڭ دەرەگىنشە، جيىن بارىسىندا بارلىق سالالىق ۆەدومستۆونىڭ اتىنا سىن-ەسكەرتپەلەر ايتىلىپ، ەگجەي-تەگجەيلى تالقىلاۋ ءوتتى. مەملەكەت باسشىسى ەكسترەميزم مەن تەرروريزمگە قارسى كۇرەستى جانە ۇلتتىق قاۋىپسىزدىكتى نىعايتۋعا باعىتتالعان ۇيلەسىمدى جۇمىستى كۇشەيتۋ قاجەت ەكەنىنە نازار اۋداردى.
- قاسىم-جومارت توقايەۆ «زاڭ جانە ءتارتىپ» قاعيداتى نەگىزىندە جۇمىستى ۇيىمداستىرۋدىڭ اسا ماڭىزدىلىعىن اتاپ ءوتىپ، اتالعان سالالارداعى جاعدايعا تالداۋ جاسادى.
پرەزيدەنت ازىق-تۇلىك جانە ەكولوگيالىق قاۋىپسىزدىكتى قامتاماسىز ەتۋدىڭ، ەل ازاماتتارىن الاڭداتاتىن ماسەلەلەردى شەشۋ ءۇشىن سيفرلىق قۇرالدار مەن جاساندى ينتەللەكتىنى دامىتۋدىڭ وزەكتىلىگىنە توقتالدى.
مەملەكەت باسشىسى بارشا قوعامنىڭ مۇددەسى ءۇشىن ۇكىمەتكە ادىلەتتى قازاقستاندى قۇرۋ باعدارلاماسىن ىسكە اسىرۋعا كۇش سالۋدى تاپسىردى، - دەلىنگەن جازبادا.
ايتا كەتەيىك، بۇگىن مەملەكەت باسشىسى قاۋىپسىزدىك كەڭەسىنىڭ وتىرىسىن وتكىزدى.
