پرەزيدەنت قاسىم-جومارت توقايەۆ يوردانيا كورولىمەن كەلىسسوز جۇرگىزدى

پرەزيدەنت ەڭ الدىمەن، كورول II ابداللانىڭ بيلىك باسىنا كەلگەنىنە شيرەك عاسىر تولۋىمەن قۇتتىقتاپ، ونىڭ يوردانيا حالقىنىڭ ءوسىپ-وركەندەۋىنە جانە ەلدىڭ ورنىقتى دامۋىن قامتاماسىز ەتۋ مەن حالىقارالىق ارەناداعى ابىروي-بەدەلىن ارتتىرۋعا باعىتتالعان جاسامپاز باستامالارىنىڭ ءساتتى جۇزەگە اسىرىلۋىنا تىلەكتەستىك ءبىلدىردى.

قاسىم-جومارت توقايەۆ ەكى ەل اراسىنداعى دوستىق پەن ىنتىماقتاستىقتى نىعايتۋعا ۇلەس قوسىپ كەلە جاتقانى ءۇشىن يوردانيا كوشباسشىسىنا العىس ايتتى. پرەزيدەنتتىڭ پىكىرىنشە، يوردانيا - بەيبىتشىلىك پەن تۇراقتىلىقتى ساقتاۋعا بەيىل ەل رەتىندە حالىقارالىق قوعامداستىق تاراپىنان مويىندالعان مەملەكەت.

- بۇل ساپارىمنىڭ ماقساتى - ءبىزدىڭ قارىم-قاتىناستارىمىزعا، دوستىعىمىز بەن ساۋدا-ەكونوميكالىق بايلانىستارىمىزعا تىڭ سەرپىن بەرۋ. الەمدە ورىن الىپ جاتقان ۇدەرىستەرگە قاتىستى كوزقاراسىمىز بەن وعان بەرەتىن باعامىز ورتاق دەپ سانايمىن. سونىمەن قاتار ءبىز ساياسي دەڭگەيدەگى ىنتىماقتاستىعىمىزدى تەرەڭدەتە تۇسۋگە نيەتتىمىز. ءبىزدىڭ ايقىن جوسپارىمىز بار. تاياۋ بولاشاقتا ناقتى ۋاعدالاستىقتارعا قول جەتكىزىپ، ونىڭ وڭ ناتيجەلەرىن كورەتىنىمىزگە سەنىمدىمىن. ءبىز ءوزارا ىقپالداستىعىمىزدىڭ اياسىندا ايانباي جۇمىس ىستەۋگە دايىنبىز. يوردانيانى دوستاس مەملەكەت دەپ سانايمىز. ەكى ەلدى بايلانىستىراتىن دۇنيە كوپ، - دەدى قاسىم-جومارت توقايەۆ.

مەملەكەت باسشىسىنىڭ ايتۋىنشا، بۇگىن قابىلداناتىن بىرلەسكەن مالىمدەمە مەن كەلىسىمدەر قازاقستان- يوردانيا ىنتىماقتاستىعىن ەكىجاقتى جانە كوپجاقتى كۇن ءتارتىبىنىڭ بارلىق باعىتى بويىنشا ارتتىرۋعا قوس تاراپ تا مۇددەلى ەكەنىن بىلدىرەدى.

يوردانيا كورولى II ابداللا قازاقستان پرەزيدەنتى قاسىم- جومارت توقايەۆتىڭ ساپارى ەكى ەل اراسىنداعى ساياسي، ساۋدا-ەكونوميكالىق، ينۆەستيتسيالىق بايلانىستاردى ودان ءارى كەڭەيتۋگە مول مۇمكىندىك بەرەتىنىن اتاپ ءوتتى.

- ءوزىڭىزدى جانە ءسىزدىڭ قۇرمەتتى دەلەگاتسياڭىزدى يوردانيادا قارسى العانىما قۋانىشتىمىن. بۇگىن ەكونوميكالىق بايلانىستاردى جانداندىرۋعا جانە جەكە سەكتور ءۇشىن مول مۇمكىندىكتەر اشىلادى. بۇل وتە ماڭىزدى، - دەدى يوردانيا كورولى.

كەلىسسوز بارىسىندا تاراپتار ساۋدا، ينۆەستيتسيا، ونەركاسىپ، اۋىل شارۋاشىلىعى، كولىك- لوگيستيكا، تۋريزم، ەنەرگەتيكا، تسيفرلاندىرۋ جانە فارماتسيەۆتيكا سەكىلدى نەگىزگى سەكتورلارداعى ءوزارا ءتيىمدى ىنتىماقتاستىقتىڭ پەرسپەكتيۆاسىن ەگجەي-تەگجەيلى تالقىلادى.

ەكى ەلدىڭ مادەني-گۋمانيتارلىق ىقپالداستىعىن كەڭەيتۋ ماسەلەلەرىنە ايرىقشا ءمان بەرىلدى. قازىرگى كەزدە قازاقستاننىڭ مەديتسينالىق وقۋ ورىندارىندا يوردانيانىڭ 300 گە جۋىق ازاماتى ءبىلىم الىپ جاتىر. سونىمەن قاتار مەملەكەت باسشىسى مەن يوردانيا كورولى حالىقارالىق جانە وڭىرلىك قاۋىپسىزدىكتىڭ وزەكتى ماسەلەلەرى جونىندە پىكىر الماستى.

كەزدەسۋ سوڭىندا پرەزيدەنت يوردانيا كورولىن قازاقستانعا ساپارمەن كەلۋگە شاقىردى.

ايتا كەتەيىك، پرەزيدەنت يوردان حاشيميت كورولدىگىنە رەسمي ساپارمەن باردى.

قازاقستان پرەزيدەنتىن كورول II ابداللا بەن ءال-حۋسەين مەن تاق مۇراگەرى ءال-حۋسەين قارسى الدى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى