پرەزيدەنت ەلورداداعى ءۇشىنشى ج ە و- نىڭ العاشقى كەزەگىنىڭ قىزمەتىمەن تانىستى
استانا. KAZINFORM - استانا اكىمى جەڭىس قاسىمبەك پرەزيدەنتكە قالانىڭ ەنەرگەتيكالىق ينفراقۇرىلىمىنىڭ دامۋ بارىسى تۋرالى ەسەپ بەردى، دەپ حابارلايدى اقوردانىڭ باسپا ءسوز قىزمەتى.
بۇگىندە ءۇشىنشى ج ە و- نىڭ العاشقى كەزەگىن، قوسىمشا قۋاتى ساعاتىنا 1100 گكال بولاتىن «تۇران» جانە «وڭتۇستىك-شىعىس» گاز جىلۋ ستانسالارىن پايدالانۋعا بەرۋ ارقىلى شاھاردىڭ جىلىتۋ قۋاتى 30 پايىزعا ۇلعايعان. بيىل «تۇران» ستانساسىنىڭ ەكىنشى كەزەگىن تولىعىمەن اياقتاۋ، سونداي-اق «تەلمان» ستانساسى مەن ەكىنشى ج ە و- نى كەڭەيتۋ جانە «وڭتۇستىك-باتىس» گاز جىلۋ ستانساسىن جوبالاۋ كوزدەلىپ وتىر. بۇل جوبالاردىڭ بارلىعىن جۇزەگە اسىرۋ 2035-جىلعا دەيىن جوسپارلانعان قوسىمشا جىلۋ ەنەرگياسىن الۋعا مۇمكىندىك بەرەدى.
قاسىم-جومارت توقايەۆقا ءۇشىنشى ج ە و- نىڭ ەكىنشى كەزەگى اياسىندا بۋ-گاز قوندىرعىسىن ورناتۋ جوسپارى كورسەتىلدى.
مەملەكەت باسشىسىنا ءۇشىنشى ج ە و- نىڭ تابيعي گازبەن جۇمىس ىستەپ، ەڭ جوعارى قۋاتى ساعاتىنا 440 گكال وندىرۋگە جەتەتىنى جونىندە باياندالدى. بۇل جىلۋ ەنەرگياسى شاھاردىڭ وڭتۇستىك-باتىس بولىگىنىڭ سۇرانىسىن وتەيدى. قازىرگى ۋاقىتتا ءۇشىنشى ج ە و- نىڭ العاشقى كەزەگىن قوسىمشا وتىن قورىمەن قامتاماسىز ەتۋ جۇمىستارى جۇرگىزىلىپ جاتىر.
پرەزيدەنت استانانىڭ ەنەرگەتيكالىق ينفراقۇرىلىمىن ودان ءارى دامىتۋدىڭ ماڭىزىنا نازار اۋداردى.
وسىعان دەيىن پرەزيدەنت سۋ ديپلوماتياسىن كۇشەيتۋدى قولعا الۋىمىز كەرەك ەكەنىن ايتتى.
