پرەزيدەنت ۇلتتىق قۇرىلتايدا كوتەرىلگەن باستامالاردى جۇزەگە اسىرۋ تۋرالى جوسپارعا قول قويدى

- بۇگىن مەملەكەت باسشىسى ۇلتتىق قۇرىلتايدىڭ IV وتىرىسىندا كوتەرگەن باستامالاردى جۇزەگە اسىرۋ تۋرالى جوسپارعا قول قويدى. 53 تارماقتان تۇراتىن بۇل قۇجاتتى پرەزيدەنت اكىمشىلىگى ۇكىمەتپەن بىرلەسىپ ازىرلەدى. جوسپاردا پرەزيدەنتتىڭ گۋمانيتارلىق جانە الەۋمەتتىك- ەكونوميكالىق سالالارداعى تاپسىرمالارىن ورىنداۋعا قاتىستى ناقتى قادامدار كوزدەلگەن، - دەپ اتاپ ءوتتى ەرلان قارين.

مەملەكەت باسشىسىنىڭ گۋمانيتارلىق باستامالارىن جۇزەگە اسىرۋ ءۇشىن:
● «قازاقستان بالالارى» ءبىرىڭعاي باعدارلاماسىن ازىرلەۋ؛
● ىشكى ساياسات تۇجىرىمداماسىن ازىرلەۋ جانە بەكىتۋ؛
● ناشاقورلىققا جانە ەسىرتكى بيزنەسىنە قارسى كۇرەستىڭ 2026-2028 -جىلدارعا ارنالعان جاڭا كەشەندى جوسپارىن قابىلداۋ،
● ۇلتتىق سيفرلىق ارحيۆ قۇرۋ؛
● بيزنەس وكىلدەرىن تارتا وتىرىپ ايماقتاردا تەاترلاردى سالۋ جانە دامىتۋ، سونداي-اق ۇلتتىق تەاترلارعا قولداۋ كورسەتۋ؛
● شەتەلدە اباي ينستيتۋتىن اشۋ؛
● حالىقارالىق بيولوگيالىق ءارالۋاندىقتى قورعاۋ قورىن قۇرۋ قاراستىرىلعان.
ال الەۋمەتتىك-ەكونوميكالىق جوبالاردىڭ ىشىنەن مىنالاردى اتاپ وتۋگە بولادى:
● «جايلى مەكتەپ» ۇلتتىق جوباسىن جۇزەگە اسىرۋدى جالعاستىرۋ، ءۇش جىلدا 1300 مەكتەپتى جاڭعىرتۋ؛
● ەرەكشە قاجەتتىلىگى بار ادامدارعا ارنالعان زاماناۋي وڭالتۋ ورتالىقتارىن اشۋ، ءاربىر وبلىس ورتالىعىندا ەرەكشە قاجەتتىلىگى بار بالالاردى وڭالتۋ جانە دامىتۋ ورتالىقتارىن قۇرۋ؛
● وڭىرلەردى دامىتۋ تۇجىرىمداماسىنا قاتىستى تىڭ تاسىلدەردى ەنگىزۋ؛
● 2025-2026-جىلدارى ءىرى ينفراقۇرىلىمدىق جوبالاردى جۇزەگە اسىرۋ، سونىڭ ىشىندە استانادان ارقالىق، تورعاي جانە ىرعىز ارقىلى ترانسكاسپي حالىقارالىق كولىك دالىزىنە تۋرا شىعاتىن اۆتوكولىك جولىن سالۋ جانە جاڭعىرتۋ، ارقالىقتاعى اۋەجايدى قالپىنا كەلتىرۋ جانە جاڭا اەروۆوكزال كەشەنىن سالۋ؛
● الداعى ءتورت جىل ىشىندە ەلىمىزدە جىل سايىن 200 گە جۋىق ينۆەستيتسيالىق جوبانى ىسكە قوسۋ.

- سونىمەن قاتار شەكارا ماڭىنداعى اۋدانداردى دامىتۋ، عىلىم قالاشىقتارىن قۇرۋ، ەرەكشە قاجەتتىلىكتەرى بار بالالاردى كەشەندى قولداۋ، ۇكىمەتتىك ەمەس ۇيىمدار جانە مەملەكەتتىك الەۋمەتتىك تاپسىرىس تۋرالى جەكە زاڭدار قابىلدانادى. جالپى، پرەزيدەنتتىڭ ۇلتتىق قۇرىلتايدىڭ IV وتىرىسىندا كوتەرگەن باستامالارى مەن بەرگەن تاپسىرمالارى مەملەكەتتىك ورگاندار ءۇشىن دە، بۇكىل قوعام ءۇشىن دە ەلىمىزدىڭ ۇزاق مەرزىمگە ارنالعان دامۋ باعدارىن ايقىندايدى، - دەپ تۇيىندەدى مەملەكەتتىك كەڭەسشى.

ايتا كەتەيىك، 14-ناۋرىزدا بۋرابايدا ۇلتتىق قۇرىلتايدىڭ IV وتىرىسى ءوتتى. مەملەكەت باسشىسى قاسىم-جومارت توقايەۆتىڭ ۇلتتىق قۇرىلتايدىڭ سويلەگەن سوزىمەن سىلتەمە ءوتىپ تانىسۋعا بولادى.

وسىعان دەيىن مەملەكەت كەڭەسشى ەرلان قارين كەشە وتكەن ۇلتتىق قۇرىلتايدىڭ ەرەكشەلىكتەرى مەن پرەزيدەنت كوتەرگەن باستامالاردى اتادى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى