پرەزيدەنت: ۇلت مۇددەسىن قورعاپ جۇرگەن جۋرناليستەردىڭ پارلامەنت تورىندە وتىرۋى - زاڭدىلىق
استانا. KAZINFORM - مەملەكەت باسشىسى قاسىم-جومارت توقايەۆ ب ا ق سالاسى قىزمەتكەرلەرىن ماراپاتتاۋ راسىمىندە سويلەگەن سوزىندە جۋرناليستەردىڭ مەملەكەتتىك باسقارۋ سالاسىندا تابىستى ەڭبەك ەتۋىنە مۇمكىندىك مول ەكەنىن ايتتى.
«جۋرناليستەر قاۋىمى ۇلتتىق پارلامەنتاريزمدى دامىتۋعا قاشان دا زور ۇلەس قوسىپ كەلەدى. قازىرگى دەپۋتاتتار قۇرامىندا اقپارات سالاسىنىڭ وكىلدەرى جەتكىلىكتى. اتاپ ايتقاندا، نۇرتورە ءجۇسىپ، ەرمۇرات باپي، قازىبەك يسا، سەرگەي پونوماريەۆ، جاناربەك ءاشىمجان، بيبىگۇل جەكسەنباي، ايگۇل قاپباروۆا سەكىلدى ارىپتەستەرىڭىز كوپشىلىككە بەلگىلى. ۇلت مۇددەسىن قورعاپ جۇرگەن جۋرناليستەردىڭ پارلامەنت تورىندە وتىرۋى - زاڭدىلىق»، - دەدى قاسىم-جومارت توقايەۆ.
پرەزيدەنتتىڭ سوزىنشە، پرەزيدەنت اكىمشىلىگىندە دە جۋرناليستەر از ەمەس.
«ولار ءوز كاسىبي ورتاسىنا قولداۋ ءبىلدىرىپ، بۇقارالىق اقپارات قۇرالدارى مەن مەملەكەتتىك ورگاندار اراسىندا التىن كوپىر قىزمەتىن اتقارادى. جاڭا اقپاراتتىق داۋىرگە قادام باستىق. وسى ورايدا مەملەكەتتىك باسقارۋ جۇيەسى ءسوز بىلەتىن، ءتيىمدى ءارى جان-جاقتى قارىم-قاتىناس ورناتا الاتىن ادامدارعا ءزارۋ. سوندىقتان ءوز مانسابىن مەملەكەتتىك قىزمەتپەن بايلانىستىرعان نەمەسە بايلانىستىرۋدى جوسپارلاپ جۇرگەن ارىپتەستەرىڭىز وسى سالادا دا ءوز الەۋەتىن تولىق جۇزەگە اسىرا الادى»، - دەدى مەملەكەت باسشىسى.
