پرەزيدەنت ۇكىمەتكە ونەركاسىپتىك قاۋىپسىزدىك نورمالارىنىڭ ساقتالۋىنا تەكسەرۋ جۇرگىزۋدى تاپسىردى

بۇل تۋرالى اقوردانىڭ باسپا ءسوز قىزمەتى حابارلادى.

➤ بەكىتىلگەن تالاپتاردىڭ ورەسكەل بۇزىلعان فاكتىلەرى بار. نىسانداردىڭ ونەركاسىپتىك قاۋىپسىزدىك جۇيەسىمەن جابدىقتالۋ دەڭگەيى وتە تومەن.

➤ كومپانيالار ەڭبەك قاۋىپسىزدىگىن قامتاماسىز ەتۋگە باعىتتالعان جوبالارعا ءتيىستى مولشەردە ينۆەستيتسيا سالمايدى. مۇنىڭ بارلىعى تەحنوگەندى اپاتتارعا، جۇمىسشىلاردىڭ قازا تابۋى مەن جاراقات الۋىنا اكەپ سوقتىرادى.

پرەزيدەنت قاتەرلى ءوندىرىس ورىندارىندا جۇمىس ىستەيتىن ازاماتتاردىڭ قاۋىپسىزدىگىن قامتاماسىز ەتۋ بويىنشا ۇكىمەتكە تومەندەگىدەي شارالار قابىلداۋدى تاپسىردى:

1. نىسانداردا ونەركاسىپتىك قاۋىپسىزدىك نورمالارىنىڭ ساقتالۋىنا قاتىستى تەكسەرۋ جۇرگىزۋ؛

2. اتالعان نىساندارعا زاماناۋي قاۋىپسىزدىك جۇيەسىن، سونىڭ ىشىندە گاز بەلگى بەرۋ قۇرىلعىلارىن، سەيسميكالىق قوندىرعىلارىن، پوزيتسيونيرلەۋ جۇيەسىن جانە تاعى باسقا ءتيىستى ءادىس-تاسىلدەردى ازىرلەۋ مەن ەنگىزۋ؛

3. بولجاۋ مەن قۇلاقتاندىرۋدىڭ اۆتوماتتاندىرىلعان جۇيەسىن ەنگىزە وتىرىپ، نىسانداردى سيفرلاندىرۋ؛

4. تەكسەرۋ قورىتىندىسى بويىنشا جەر قويناۋىن پايدالانۋشىلاردىڭ جۇمىس باعدارلامالارىنا تۇزەتۋلەر ەنگىزىپ، زاماناۋي ونەركاسىپتىك قاۋىپسىزدىك جۇيەسىنە سالىناتىن ينۆەستيتسيا كولەمىن ۇلعايتۋ جولىن قاراستىرۋ؛

5. ونەركاسىپتىك قاۋىپسىزدىك سالاسىنداعى باقىلاۋ مەن قاداعالاۋ تەتىكتەرىن قاتاڭداتۋ.

مەملەكەت باسشىسىنىڭ بۇل تاپسىرمالارىن پرەزيدەنت اكىمشىلىگى ەرەكشە باقىلاۋدا ۇستايدى.

وسىعان دەيىن «قازاق مىس» كورپوراتسياسى جەتى كەنشى قازا بولعان جومارت كەنىشىندەگى اپات ورنىندا اۆاريالىق- قۇتقارۋ بريگادالارى تاۋ جىنىسىنىڭ وپىرىلماعانىن انىقتاعانى تۋرالى جازعان ەدىك.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى