پرەزيدەنت ەكونوميكالىق ىنتىماقتاستىق جانە دامۋ ۇيىمىنىڭ باس حاتشىسى ماتياس كورمانمەن كەزدەستى
بەيجىڭ. KAZINFORM - بواو ازيا فورۋمىنىڭ اياسىندا مەملەكەت باسشىسى ەكونوميكالىق ىنتىماقتاستىق جانە دامۋ ۇيىمىنىڭ (ە ى د ۇ) باس حاتشىسى ماتياس كورمانمەن كەزدەسۋ وتكىزدى.
قازاقستان پرەزيدەنتى باس حاتشىعا ءىلتيپات بىلدىرە وتىرىپ، ونىڭ بواو فورۋمىنا قاتىسۋى ە ى د ۇ- نىڭ ازياعا ايرىقشا نازار اۋداراتىنىن دالەلدەيدى دەپ اتاپ ءوتتى.
- بۇل ايماقتى الىپ ەكونوميكالىق قاۋىمداستىق دەۋگە بولادى. سونداي- اق قازاقستان وسى كەڭىستىكتە، كەم دەگەندە، وڭىرلىك ولشەمدە اسا ماڭىزدى ءرول اتقارادى. فورۋمدا سويلەگەن سوزىمدە ە ى د ۇ- مەن اراداعى ىنتىماقتاستىققا ەرەكشە ءمان بەرەتىنىمىز جونىندە ايتتىم. وكىلدەرىمىز ەىدۇ كوميتەتتەرىنىڭ وتىرىستارىنا تۇراقتى تۇردە قاتىسادى. ءبىز ۇيىمنىڭ ۇسىنىستارىن ەسكەرۋگە تىرىسامىز. وزدەرىڭىزگە ءمالىم، مەن قازاقستاننىڭ ەكونوميكالىق ساياساتىن ە ى د ۇ- نىڭ جوعارى ستاندارتتارىنا سايكەستەندىرۋ جونىندە ماقسات قويدىم، - دەدى قاسىم-جومارت توقايەۆ.
مەملەكەت باسشىسى ە ى د ۇ- مەن ىقپالداستىق ورناعان ۋاقىتتان بەرى قازاقستان ءبىرقاتار ماڭىزدى قۇجاتقا قول قويعانىن ايتتى. بۇدان بولەك، ە ى د ۇ- نىڭ باسقا دا مىندەتتى قۇقىقتىق ينستيتۋتتارىنا قوسىلۋ جۇمىستارى جۇرگىزىلىپ جاتىر.
ماتياس كورمان ۇيىمنىڭ ازيا ەلدەرىمەن، سونىڭ ىشىندە قازاقستانمەن جان-جاقتى قارىم-قاتىناستى نىعايتۋعا بەيىلدى ەكەنىن راستادى.
- قازاقستان مەن ە ى د ۇ اراسىنداعى بايلانىستار وتە جاقسى دامىپ كەلەدى دەپ ويلايمىن. بولاشاقتا بۇل قاتىناستاردى كەڭەيتۋ جانە نىعايتۋ ءۇشىن مول الەۋەت بار. قازاقستان ءوز ساياساتىن ە ى د ۇ- نىڭ ستاندارتتارى مەن وزىق تاجىريبەسىنە سايكەستەندىرۋگە نيەتتى ەكەنى قۋانتادى. ءسىزدىڭ رەفورمالارىڭىزدىڭ باعدارلامالارىنا كومەكتەسۋ جانە قولداۋ كورسەتۋ ءۇشىن بار كۇش-جىگەرىمىزدى جۇمساۋعا دايىنبىز. ءبىز بۇگىندە الدىمىزدا تۇرعان كوپتەگەن ماسەلەنى شەشۋ ماقساتىندا جاھاندىق ىنتىماقتاستىق دەڭگەيىن كوتەرۋگە مۇددەلىمىز،-دەدى ەىدۇ باسشىسى.
قاسىم- جومارت توقايەۆ قازاقستاندا ۇيىمنىڭ وڭىرلىك كەڭسەسىن اشۋ جۇمىستارىن جالعاستىرۋ ماڭىزدى ەكەنىن ايتتى. سونداي-اق ەىدۇ وكىلدەرىن الداعى استانا حالىقارالىق فورۋمىنا قاتىسۋعا شاقىردى.
