پرەزيدەنت كونستيتۋتسيالىق سوتتىڭ 2023-جىلى اتقارعان جۇمىسىنا باعا بەردى
استانا. KAZINFORM - مەملەكەت باسشىسى كونستيتۋتسيالىق سوت ءتوراعاسى ەلۆيرا ازيموۆانى قابىلدادى. بۇل تۋرالى اقوردانىڭ باسپا ءسوز قىزمەتى حابارلادى.
ەلۆيرا ازيموۆانىڭ بايانداۋىنشا، بىلتىر كونستيتۋتسيالىق سوتقا بەس مىڭنان استام ءوتىنىش، ونىڭ 99 پايىزى ازاماتتاردان كەلىپ تۇسكەن. ازاماتتار ءوز وتىنىشتەرىندە سوت اكتىلەرىنە، لاۋازىمدى تۇلعالار مەن سۋديالاردىڭ ءىس-ارەكەتتەرىنىڭ زاڭدىلىعىنا، قىلمىستىق جازانىڭ تۇرلەرى مەن شارتتارىنا، قىلمىستىق قۋدالاۋ كەزىندە ادام قۇقىقتارىنىڭ ساقتالۋىنا، ەڭبەك جانە اكىمشىلىك-قۇقىقتىق قاتىناستاردا قۇقىقتىڭ قورعالۋىنا قاتىستى ماسەلەلەردى كوتەرگەن. كونستيتۋتسيالىق ءىس جۇرگىزۋ اياسىندا ازاماتتارعا كەپىلدى زاڭ كومەگىن بەرۋ شارتتارى، سونداي-اق قۇقىقتىق مونيتورينگ پەن زاڭ شىعارۋ قىزمەتى شەڭبەرىندە كونستيتۋتسيالىق سوت قابىلداعان شەشىمدەردى جانە سوت پراكتيكاسىنىڭ شولۋىن ەسكەرۋ تۋرالى ۇسىنىستار قازىرگى ۋاقىتتا پارلامەنت ءماجىلىسىنىڭ قاراۋىندا جاتىر.
بىلتىر 558 قۇقىق نورماسى تەكسەرىلىپ، ناتيجەسىندە 29 نورماتيۆتىك-قۇقىقتىق اكتىگە وزگەرىستەر ەنگىزۋ جونىندە كەڭەس بەرىلگەن.
قىلمىستىق-پروتسەسسۋالدىق، سالىق كودەكستەرىنىڭ جانە ءبىرقاتار زاڭنىڭ جەكەلەگەن نورمالارىن قايتا قاراۋ جونىندە ۇسىنىستارىن بەرگەن. بۇگىندە ۇكىمەت پەن ۋاكىلەتتى ورگاندار اتالعان ۇسىنىمداردىڭ 16 پايىزدان استامىن ورىنداعان.
پرەزيدەنت كونستيتۋتسيالىق سوتتىڭ 2023 -جىلى اتقارعان جۇمىستارىنىڭ قورىتىندىسىن باعالاي وتىرىپ، اتالعان ورگاننىڭ قۇرىلۋى جانە ونىڭ قىزمەتى قازاقستان رەسپۋبليكاسى كونستيتۋتسياسىنىڭ مۇلتىكسىز ساقتالۋىن قامتاماسىز ەتۋگە، ادام مەن ازاماتتاردىڭ قۇقىقتارىن، بوستاندىعىن قورعاۋعا قاتىستى قوعام مەن مەملەكەتتىڭ سۇرانىسىنا ساي كەلەتىنىن ايتتى.
اۆتور
ەلميرا ورالبايەۆا
