پرەزيدەنت ۋكرايناداعى جاعداي تۋرالى: ەكى الپاۋىت ەلدىڭ ساياسي سۇحبات جۇرگىزە باستاۋى - جاقسى ءۇردىس
استانا. KAZINFORM - مەملەكەت باسشىسى قاسىم-جومارت توقايەۆ ۋكراينا توڭىرەگىندەگى جاعدايعا قاتىستى پىكىر ءبىلدىردى، دەپ حابارلايدى اقوردانىڭ باسپا ءسوز قىزمەتى.
قاسىم-جومارت توقايەۆ ۋكراينا توڭىرەگىندەگى جاعداي تۋرالى پىكىر ءبىلدىرىپ، ەلىمىزدىڭ تىنىشتىعى مەن تۇراقتىلىعى ەڭ باستى قۇندىلىق ەكەنىنە نازار اۋداردى.
- ءبىز «بىرلىگىمىز - ءارالۋاندىقتا» يدەولوگياسىن تەمىرقازىق ەتىپ ۇستانىپ وتىرمىز. ۇلتىمىز بەن نانىم-سەنىمىمىز ءارتۇرلى ەكەنىنە قاراماستان، ءبىر قوعامدا تۇتاس حالىق بولىپ ءومىر سۇرەمىز. مەن بارشاڭىزدى وسىناۋ تەرەڭ ۇدەرىستى تولىق تۇسىنۋگە شاقىرامىن. سوندا عانا تابىسقا جەتە الامىز. قازىر ۋكراينا جونىندە كوپ ايتىلىپ جاتىر. ءبىز العاشقى كەزدەن باستاپ وسى سوعىستى مىندەتتى تۇردە توقتاتۋ كەرەك، ديپلوماتيالىق كەلىسسوزدەر ارقىلى ءبىر مامىلەگە كەلۋ قاجەت دەپ ايتتىق. بۇل ۇستانىمىمىز ەندى شىندىققا اينالدى. ەكى الپاۋىت ەل ساياسي سۇحبات جۇرگىزە باستادى. بۇل - جاقسى ءۇردىس. ءارى قازاقستانعا پايداسىن تيگىزەدى. سوندىقتان ءبىز مۇنى مەيلىنشە قولدايمىز، - دەدى پرەزيدەنت.
ايتا كەتەيىك، بۇگىن پرەزيدەنت «جۇمىسشى ماماندىقتارىنىڭ قالاسى» فەستيۆالىنە باردى. EXPO كورمە الاڭىندا بولاشاق مامانداردىڭ، جۇمىس بەرۋشىلەر مەن كاسىپتىك-تەحنيكالىق ۇيىمداردىڭ باسىن قوسقان «جۇمىسشى ماماندىقتارىنىڭ قالاسى» فەستيۆالى ءوتىپ جاتىر.
اۆتور
اينۇر تۋماكبايەۆا
